ముహూర్త కార్యక్రమాలు జరుపుకున్న స్వాతి త్రిపుర

Posted: 04/06/2015 01:45 PM IST

శ్రీనివాస్ రెడ్డి, అంజలి ప్రధాన పాత్రలో రాజకిరణ్ దర్శకత్వంలో రూపొందిన చిత్రం ‘గీతాంజలి’. ఈ సినిమా ఎంతటి విజయం సాధించిందో అందరికి తెలిసిందే. ఈ చిత్రం తర్వాత రాజకిరణ్ దర్శకత్వంలో మరో చిత్రం తెరకెక్కనుంది. స్వాతి ప్రధాన పాత్రలో రూపొందనున్న ఈ చిత్రానికి ‘త్రిపుర’ అనే టైటిల్ ఖరారు చేసారు.

ఈ చిత్ర ముహూర్త కార్యక్రమాలు నేడు లాంఛనంగా ప్రారంభమయ్యాయి. ఈ కార్యక్రమానికి దర్శకుడు బోయపాటి శ్రీను ముఖ్య అతిథిగా విచ్చేసారు. స్వాతి, పావని సమర్పణలో క్రేజీ మీడియా పతాకంపై ఎ. చినబాబు, ఎం. రాజశేఖర్ ఈ చిత్రాన్ని నిర్మిస్తున్నారు.

ఈనెల 13 నుంచి 25 వరకు తొలి షెడ్యూల్ జరుగనుంది. స్వాతికి ఇది నటిగా మరో మంచి చిత్రం అవుతుందని ‘త్రిపుర’ చిత్ర యూనిట్ చెబుతున్నారు. ఈ చిత్రానికి సంబంధించిన మరిన్ని వివరాలు త్వరలోనే తెలియనున్నాయి.

ఈ చిత్రానికి మాటలు: రాజా, స్ర్కీన్ ప్లే: శ్రీనివాస్ వెలిగొండ, సంగీతం: కమ్రాన్, కెమెరా: రవికుమార్ సానా, నిర్మాతలు: ఎ. చినబాబు, ఎం. రాజశేఖర్, రచన-దర్శకత్వం: రాజ కిరణ్.