చెర్రీ సినిమాకు థమన్ సౌండ్ ఫిక్స్

Posted: 03/20/2015 11:17 AM IST

Thaman to replace anirudh for ram charan latest film

రాంచరణ్ హీరోగా ప్రముఖ దర్శకుడు శ్రీనువైట్ల దర్శకత్వంలో ఓ చిత్రం తెరకెక్కుతున్న విషయం తెలిసిందే. ఈ ప్రాజెక్టు నుంచి తమిళ యువ సంగీత దర్శకుడు అనిరుధ్ తప్పుకున్నాడు. ఈ చిత్ర షూటింగ్ ఇటీవలే ప్రారంభమయ్యాయి. మొదటి షెడ్యూల్ మరో రెండు రోజుల్లో పూర్తి కానుంది.

రెండవ షెడ్యూల్ ఏప్రిల్ 2 నుంచి ప్రారంభం కానుంది. అయితే ఈ చిత్రానికి అనిరుధ్ ను సంగీత దర్శకుడిగా ఎంపిక చేసుకున్నారు. కానీ అనిరుధ్ ప్రస్తుతం తమిళంలో వరుస చిత్రాలతో బిజీగా వుండటం వలన ఈ సినిమాపై ఆసక్తి కనబరచకపోవడంతో... ఈ ప్రాజెక్ట్ నుంచి అనిరుధ్ తప్పుకున్నాడు.

దీంతో ఈ సినిమాకు థమన్ ను సంగీత దర్శకుడిగా ఎంపిక చేసారు. గతంలో శ్రీనువైట్ల, థమన్ కాంబినేషన్లో ‘దూకుడు’, ‘బాద్ షా’, ‘ఆగడు’ వంటి చిత్రాలొచ్చాయి. అలాగే రాంచరణ్, థమన్ కాంబినేషన్లో ‘నాయక్’ అనే హిట్ చిత్రం వచ్చింది. కాబట్టి.. ఈ ముగ్గురి కాంబినేషన్లో రాబోతున్న ఈ సినిమా కూడా మ్యూజికల్ హిట్ గా నిలుస్తుందని చిత్ర యూనిట్ భావిస్తున్నారు.

ప్రముఖ నిర్మాత డి.వి.వి.దానయ్య డి.వి.వి. ఎంటర్టైన్మెంట్స్ పతాకంపై నిర్మిస్తున్న ఈ చిత్రానికి ప్రముఖ రచయితలు కోనవెంకట్, గోపి మోహన్ లు కలిసి కథ, మాటలు అందిస్తున్నారు. రకూల్ ప్రీత్ సింగ్ హీరోయిన్ గా నటిస్తుంది. అక్టోబర్ 15న ఈ చిత్రాన్ని విడుదల చేయడానికి సన్నాహాలు చేస్తున్నారు.