అఖిల్ కు తండ్రెవరో తెలిసిపోయింది

Posted: 03/19/2015 10:31 AM IST

అక్కినేని అఖిల్ హీరోగా వి.వి.వినాయక్ దర్శకత్వంలో ఓ చిత్రం తెరకెక్కుతున్న విషయం తెలిసిందే. అన్నపూర్ణ స్టూడియోస్ సమర్పణలో శ్రేష్ఠ్ మీడియా పతాకంపై నితిన్ తన తండ్రి సుధాకర్ రెడ్డితో కలిసి ఈ చిత్రాన్ని నిర్మిస్తున్నారు. ఇటీవలే ఈ చిత్ర షూటింగ్ ప్రారంభమయ్యింది. ఇందులో అఖిల్ సరసన సయేశా సైగల్ హీరోయిన్ గా నటిస్తుంది.

ప్రస్తుతం ఈ చిత్ర షూటింగ్ హైదరాబాద్ లో జరుగుతుంది. అయితే ఈ సినిమాలో అఖిల్ కు తండ్రి పాత్రలో ఎవరూ నటించనున్నారోనని గతకొద్ది రోజులుగా వార్తలొచ్చాయి. అయితే తాజాగా ఈ పాత్రలో రాజేంద్రప్రసాద్ ఖరారు చేసారు. ప్రస్తుతం రాజేంద్రప్రసాద్ వరుస చిత్రాలతో బిజీగా వున్నారు.

మంచి పాత్రలలో నటిస్తూ నటుడిగా, క్యారెక్టర్ ఆర్టిస్టుగా దూసుకుపోతున్నాడు. ఈ సినిమాలో అఖిల్ తండ్రి పాత్రకు రాజేంద్రప్రసాద్ అయితేనే బాగుంటాడనే వుద్దేశ్యంతోనే రాజేంద్రప్రసాద్ ను ఎంపిక చేసినట్లుగా తెలిసింది. అలాగే ఇందులో రాశిఖన్నా ఓ స్పెషల్ సాంగ్ లో నటించనుంది. ఇందుకోసం ఓ భారీ సెట్ ను ఏర్పాటు చేయనున్నట్లుగా తెలిసింది.

రచయిత వెలిగొండ శ్రీనివాస్ కథ అందిస్తున్నారు. కోన వెంకట్ – గోపి మోహన్ లు స్క్రీన్ ప్లే, మాటలు సమకూరుస్తున్నారు. థమన్, అనూప్ లు సంగీతం అందిస్తున్నారు. ఈ సినిమాలో నితిన్ ఓ గెస్ట్ రోల్ లో కనిపించనున్నాడు. ఈ చిత్రానికి సంబంధించిన ఇతర నటీనటులు, సాంకేతిక నిపుణుల వివరాలు త్వరలోనే అధికారికంగా ప్రకటించనున్నారు.