ఫలించిన చెర్రీ ఆశయం.. 14వ తేదీన రంగం సిద్ధం!

Posted: 03/11/2015 05:35 PM IST

Ram charan tej little fan balabhairava parashuram magadheera dialogues

దర్శకధీర రాజమౌళి దర్శకత్వంలో రామ్‌చరణ్ నటించిన ‘మగధీర’ సినిమా అప్పట్లో బ్లాక్ బస్టర్ హిట్ అయిన విషయం తెలిసిందే! తెలుగు ఇండస్ట్రీలోనే అత్యధిక వసూళ్లను రాబట్టింది ఆ మూవీ! ఎందుకంటే.. అందులోని ప్రతిఒక్క సన్నివేశం, డైలాగులు అందరినీ ఆకట్టుకున్నాయి. ముఖ్యంగా చెర్రీ 100 మందిని చంపే సన్నివేశంలో భాగంగా ఇతనికి, షేర్ ఖాన్ (శ్రీహరి) మధ్య వున్న డైలాగులు బాగానే పాపులర్ అయ్యాయి. ఈ డైలాగ్స్ పెద్దలనేకాదు, చివరకు చిన్నారులనూ ఎంతగానే ఆకట్టుకుంటోంది. ఇప్పటికీ ఆ డైలాగులకు ఇంకా ఆదరణ కొనసాగుతోంది. అందుకు ఉదాహరణగా తాజాగా ఓ బాలుడు చెప్పిన ఆ మగధీర డైలాగ్స్ వీడియో ప్రస్తుతం సోషల్ నెట్‌వర్క్‌లో హల్ చల్ చేస్తోంది.

ఈ వీడియోని చూసిన చెర్రీ.. ఆ బాలుడి టాలెంట్‌కి ఫిదా అయిపోయి అతడ్ని కలవాలని నిశ్చయించుకున్నాడు. ఆ బాలుడి వీడియోను తాను ప్రతీరోజూ చూస్తానని.. అతని టాలెంట్ తనను ఆకర్షించిందని.. ఆ కుర్రాడిని కలవాలని వుందంటూ సోషల్ మీడియాలో పోస్ట్ చేశాడు. అంతేకాదు అడ్రస్ కోసం ఆరా తీయాలని తన సన్నిహితులకు ఫేస్‌బుక్‌ ద్వారా విజ్ఞప్తి చేశాడు. దీంతో చెర్రీ కోరిక మేరకు స్పందించిన అతని ఫ్యాన్స్... వెంటనే ఆ బుల్లి స్టార్ ను వెతకడం ప్రారంభించారు. చివరికి అతను ఎక్కడుంటాడు, అతని పేరేంటి, కుటుంబ నేపథ్యమేంటి..? అన్న వివరాలను వాళ్లు తెలుసుకోగలిగారు. అలా ఆ విధంగా ఆ బుల్లి స్టార్ వివరాలు బయటి ప్రపంచానికి తెలిశాయి.

మహబూబ్ నగర్ జిల్లాలో అయిజకు చెందిన పేద దంపతుల కొడుకే ఈ పరశురామ్. తల్లిదండ్రులూ గొర్రెల కాపరులే! పేదరికం కారణంగా ఈ బుడ్డోడు బడికి వెళ్లలేకపోయాడు. చదువుకోకపోయినా ఇంగ్లీష్ రైమ్స్ చెప్పేస్తాడు. అంతేకాదు.. చూసిన సినిమాలో డైలాగులు చెప్పడంలో పరశురాం దిట్ట. ఆ విధంగానే చెప్పిన మగధీర సినిమా డైలాగుల్ని స్థానిక యువకులు షూట్ చేసి.. ఆ వీడియోని సోషల్ మీడియాలో పోస్ట్ చేశారు. అంతే! అప్పటినుంచి ఆ వీడియోకు లక్షల కొద్దీ లైకులు.. కామెంట్లు. ఈ విషయం ఆనోటా ఈనోటా తిరుగుతూ చివరికి చెర్రీదాకా వెళ్లింది. ఆ వీడియోను చూసి చెర్రీ ఒక్కసారిగా షాకయ్యాడు.

గ్యాప్ లేకుండా డైలాగులు చెప్పిన ఆ బుడ్డోడి టాలెంట్ కి ఫిదా అయిపోయాడు. దీంతో అతనిని కలవాలని నిర్ణయించుకున్నాడు. ఈ నేపథ్యంలో అతని ఫ్యాన్స్ ఆ బుల్లి స్టార్ ఆచూకీ తెలుసుకున్నారు. దీంతో చెర్రీ అతనికి కలిసేందుకు సిద్ధమయ్యాడు. ఈనెల 14వ తేదీన రామ్ చరణ్ ఆ అబ్బాయిని కలిసేందుకు వెళుతున్నాడని సమాచారం! చెర్రీ కలయికతో ఆ అబ్బాయి భవిష్యత్ పేదరికం నుంచి బయటపడి సరికొత్త ప్రపంచాన్ని ఆస్వాదించగలుగుతాడని అంతా అనుకుంటున్నారు. ఇప్పటికే చెర్రీ ఇలా ఎంతోమంది పేదపిల్లలను ఆదుకుని వారికి జీవనాధారం కల్పించాడు. ఇప్పుడు ఈ పిల్లాడి భవిష్యత్ బాధ్యతల్ని కూడా చెర్రీ తీసుకోవడానికి రెడీ అయ్యాడు!