ప్రేమ్ రక్షిత్ స్టెప్పులకు బాలయ్య స్టైలిష్ డాన్స్

Posted: 03/04/2015 10:41 AM IST

Balakrishna dance in prem rakshit choreography

నందమూరి బాలకృష్ణ హీరోగా నటిస్తున్న 98వ చిత్రం ‘లయన్’. సత్యదేవా దర్శకత్వంలో రూపొందుతున్న ఈ చిత్ర షూటింగ్ తుదిదశకు చేరుకుంది. ప్రస్తుతం ఈ చిత్ర షూటింగ్ హైదరాబాద్ లోని రామోజీ ఫిల్మ్ సిటీలో జరుగుతోంది. ఇందులో బాలకృష్ణ మరియు ప్రధాన నటీనటులు, సినిమాలో నటిస్తున్న బాలయ్య కుటుంబ సభ్యుల నేపథ్యంలో వచ్చే ఓ ఫ్యామిలీ సాంగ్ ను తెరకెక్కిస్తున్నారు.

ఈ పాటను ప్రముఖ కొరియోగ్రాఫర్ ప్రేమ్ రక్షిత్ నేతృత్వంలో చిత్రీకరిస్తున్నారు. ‘యమదొంగ’ సినిమాలో ఎన్టీఆర్ వేసిన ‘నాచోరే...’ సాంగ్ ద్వారా భారీ క్రేజ్ ను సొంతం చేసుకున్న ప్రేమ్ రక్షిత్... ప్రస్తుతం టాలీవుడ్ లోని స్టార్ హీరోలకు డాన్స్ కంపోజ్ చేస్తున్నాడు. ఈ సాంగ్ తో ‘లయన్’ షూటింగ్ దాదాపు పూర్తవుతోంది. ఇప్పటికే పోస్ట్ ప్రొడక్షన్ పనులు శరవేగంగా జరుగుతున్నాయి.

ఇటీవలే విడుదలైన బాలయ్య ‘లయన్’ ఫస్ట్ లుక్ స్టిల్స్, ట్రైలర్ కు మంచి స్పందన వస్తోంది. ఇటీవలే ఈ చిత్ర శాటిలైట్ హక్కులను ప్రముఖ జెమిని టీవి ఛానెల్ వారు భారీ మొత్తానికి కొనుగోలు చేసినట్లుగా సమాచారం.

రుద్రపాటి రమణారావు నిర్మిస్తున్న ఈ చిత్రంలో బాలయ్య సరసన త్రిష, రాధిక ఆప్టే హీరోయిన్లుగా నటిస్తున్నారు. మణిశర్మ సంగీతం అందిస్తున్న ఈ చిత్ర ఆడియో ఈనెల చివర్లో విడుదల చేయనున్నారు. ఏప్రిల్ లో సినిమాను ప్రపంచ వ్యాప్తంగా ప్రేక్షకుల ముందుకు తీసుకురానున్నారు.