దసరా టార్గెట్ ఫిక్స్ చేసిన డిక్టేటర్

Posted: 02/12/2015 12:58 PM IST

నందమూరి బాలకృష్ణ ప్రస్తుతం ‘లయన్’ సినిమా షూటింగ్ లో బిజీగా వున్నాడు. సత్యదేవా దర్శకత్వంలో తెరకెక్కుతున్న ఈ సినిమాలో బాలయ్య సరసన త్రిష, రాధిక ఆప్టేలు హీరోయిన్లుగా నటిస్తున్నారు. ఇటీవలే విడుదలై ఫస్ట్ లుక్ స్టిల్స్, ట్రైలర్లకు మంచి స్పందన వస్తోంది. ఎస్.ఎల్.వి సినిమా సంస్థలో నిర్మాత రుద్రపాటి రమణారావు నిర్మిస్తున్న ఈ చిత్రానికి మణిశర్మ సంగీతం అందిస్తున్నాడు. ఈ చిత్ర ఆడియోను ఈనెల చివర్లో విడుదల చేయడానికి సన్నాహాలు చేస్తున్నారు.

ఈ సినిమా తర్వాత బాలకృష్ణ 99వ చిత్రం ప్రముఖ దర్శకుడు శ్రీవాస్ దర్శకత్వంలో రూపొందనున్న విషయం తెలిసిందే. ఈ చిత్రాన్ని ప్రముఖ నిర్మాణ సంస్థ ఈరోస్ ఇంటర్నేషనల్ వారు నిర్మించబోతున్నారు. కోన వెంకట్, గోపి మోహన్ లు కథను సిద్ధం చేస్తున్నారు. ఈ చిత్రానికి ‘డిక్టేటర్’ అనే టైటిల్ ఖరారు చేసారు. ఇప్పటికే ప్రీ ప్రొడక్షన్ పనులు దాదాపు పూర్తయిన ఈ ప్రాజెక్ట్ త్వరలోనే సెట్స్ పైకి వెళ్లనుంది.

నయనతార హీరోయిన్ గా నటించనున్న ఈ సినిమాలో సెకండ్ హీరోయిన్ గా హన్సిక, రెజీనాల పేర్లు వినిపిస్తున్నాయి. త్వరలోనే అధికారికంగా ప్రకటించనున్నారు. హైదరాబాద్, డిల్లీ, యూరప్ లలో షూటింగ్ జరిపి, దసరా కానుకగా ఈ సినిమాను విడుదల చేయాలని పక్కాగా ప్లాన్ చేస్తున్నారు. దాదాపు 40 కోట్ల బడ్జెట్ తో రూపొందనున్న ఈ చిత్రానికి థమన్ సంగీతం అందించనున్నాడు. ఈ ఏడాది దసరా బరిలో బాలయ్య ‘డిక్టేటర్’ సినిమా వుండటం ఖాయమని చిత్ర యూనిట్ చెబుతున్నారు.