పావురాల్లాగే కాజల్ భయం తుర్రుమని ఎగిరిపోయిందట!

Posted: 01/28/2015 04:57 PM IST

దక్షిణాది ఇండస్ట్రీలో టాప్ హీరోయిన్’గా కొనసాగుతున్న కాజల్ అగర్వాల్’కి సంబంధించి ఎవరికీ తెలియని ఓ రహస్యం ఇన్నాళ్లకు బయటపడింది. ఇండస్ట్రీలో తిరుగులేకుండా దూసుకుపోతున్న ఈ అమ్మడు ఓ విషయంలో మాత్రం చాలా భయపడేదట! ఎప్పుడో చిన్నప్పటినుంచి ఆ భయాన్ని తన మనసులోనే దాచుకున్న ఈ పంజాబీ భామ.. ఇప్పుడు రివీల్ చేసింది. అసలు ఆమె ఏ విషయంలో భయపడేదని అనుకుంటున్నారా..? అయితే మేటర్’లోకి వెళ్లాల్సిందే!

చిన్నప్పటి నుంచి కాజల్’కి పక్షులంటే ఎంతో భయమట! అందుకే.. వాటి దరిదాపులకే వెళ్లేది కాదట! ముఖ్యంగా పావురాలంటే దడుచుకుపోయేదట! అవి కనిపించినప్పుడల్లా ఆమడదూరంలో వుండి వాటిని వీక్షించేందట! అలాంటి కాజల్’కి ఇప్పుడు ఆ భయం పూర్తిగా పోయిందని సంతోషంగా వ్యక్తం చేస్తోంది. అది కూడా ఓ తమిళ హీరో చేసిన సహాయం మేరకు తన మనసులోని ఈ పావురాల భయాన్ని పోగొట్టుకున్నట్లు వెల్లడించింది. ఆ హీరో మరెవ్వరో కాదు.. హీరో ధనుష్!

ప్రస్తుతం కాజల్ తమిళంలో ధనుష్ సరసన ‘మారీ’ అనే చిత్రంలో నటిస్తోంది. ఆ సినిమాలో ఈ అమ్మడు పక్షులతో కలిసి నటించాల్సి వుంది. మొదట్లో ఈ సీన్ గురించి ఆమెను వివరించగా.. భయంతో చేయనంటూ మొండికేసిందట! పక్షులంటే తనకు భయమని, ముఖ్యంగా పావురాలంటే చచ్చేంత భయమని, తాను ఆ సీన్’లో నటించనంటూ మారాం చేసిందట! అయితే యూనిట్ సభ్యులు ఆ పావురాలను ఈమెకు మెల్లగా అలవాటు చేయడంతో వాటితో చనువు ఏర్పడిందని స్వయంగా కాజల్ వివరించింది.

ఈ విషయంపై కాజల్ మాట్లాడుతూ.. ‘‘మారీ’ సినిమాలో నేను పక్షులతో కలిసి నటించాల్సి వుంది. ఆ విషయం తెలియగానే మొదట్లో తెగ భయపడ్డాను. అయితే తర్వాత యూనిట్ సభ్యులు ఆ పక్షులను నాకు మెల్లగా అలవాటు చేయడంతో వాటితో స్నేహం ఏర్పడింది. దాంతో ఇప్పుడు నాకు పక్షులంటే వున్న భయం పూర్తిగా పోయింది’’ అంటూ మురిసిపోతూ సంతోషాన్ని వ్యక్తం చేస్తోంది.

AS