హీరోయిన్లు పెళ్లి చేసుకుంటే పనికిరారు? తాప్సీ

Posted: 07/14/2014 12:08 PM IST

(Image source from: tapsee pannu controversial comments on marriage and south film industry)

అప్పుడప్పుడు కొంతమంది భామలు తమ వ్యక్తిగత భావాలను బహిర్గతం చేసి సంచలనాలను సృష్టిస్తుంటారు. ఒక్కొక్కరు ఒక్కొక్క విధంగా తమ భావాలను వ్యక్తపరుస్తూ కొన్నాళ్లవరకు సంచలన హీరోయిన్ గా పేరు సంపాదించుకుంటారు. ఇప్పుడు తాజాగా ఫ్లాపుల హీరోయిన్ గా మూటగట్టుకున్న తాప్సీ కూడా ఇదే కోవలోకి చేరినట్టు కనిపిస్తోంది. పెళ్లి మీద తన అభిప్రాయాన్ని వ్యక్తం చేస్తూ... హీరోయిన్లు పెళ్లి చేసుకుంటే ఆ తరువాత వారికి గడ్డు పరిస్థితే అంటూ స్టేట్ మెంట్ ఇచ్చింది.

తాప్సీ నటించిన చాలా సినిమాల్లో దాదాపుగా అన్ని ఫ్లాపులు అయినవే! అయినా కూడా ఈమెకు ఆఫర్లు మాత్రం వస్తూనే వున్నాయి. ఇటు సౌత్ ఇండస్ట్రీలోనే కాకుండా బాలీవుడ్ లో సైతం బిజీ హీరోయిన్ గా మారిపోయింది. ఈ పంబాబీ భామ. ఇక్కడివరకు బాగానే వుంది కానీ... పెళ్లి మీద మీ అభిప్రాయం ఏంటని ప్రశ్నిస్తే... హీరోయిన్లకు పెళ్లి చేసుకున్న తరువాత హీరోయిన్ గా అవకాశాలు రావంటూ చెబుతూనే... కొన్ని ఘాటు కామెంట్లు చేసేసింది.

సౌత్ ఇండస్ట్రీలో వున్న హీరోయిన్లు పెళ్లి చేసుకుంటే.. నువ్వు హీరోయిన్ గా పనికిరావని ముద్ర వేస్తారని.. వారికి కేవలం అమ్మ, అక్క, వదిన లేదా సైడ్ క్యారెక్టర్లకు మాత్రమే పరిమితం చేస్తారని చెప్పింది. గతంలో హీరోయిన్ గా తారలు కూడా పెళ్లి చేసుకున్న తరువాత ఇటువంటి పాత్రలకే ఫిక్సయ్యారని గుర్తు చేసింది. అందుకే కొంతమంది హీరోయిన్లు వయసు మీద పడ్డా కూడా ఇంతవరకు పెళ్లిళ్లు చేసుకోకుండా సినిమా ఆఫర్ల కోసం చక్కర్లు కొడుతూ తిరుగుతున్నారని సంచలనం వ్యాఖ్యలు చేసింది. అంటే.. సౌత్ ఇండస్ట్రీ పెళ్లి చేసుకున్న హీరోయిన్లను చిన్నచూపుగా చూస్తుందని ఇన్ డైరెక్ట్ గా చెప్పేసింది.

అదేవిధంగా హాలీవుడ్ చిత్ర పరిశ్రమ గురించి చెబుతూ... ‘‘హాలీవుడ్ లో పెళ్లి చేసుకున్న హీరోయిన్లు మాత్రం 40 ఏళ్లు దాటినా కూడా రొమాంటిక్ సినిమాలు చేస్తూ రాణిస్తున్నారని, అక్కడ హీరోయిన్లకు పెళ్లియినా, కాకపోయినా హీరోయిన్ గానే కొనసాగుతారు. కానీ మన సౌత్ ఇండస్ట్రీ మాత్రం అందుకు భిన్నంగా వుంటుంది. పెళ్లియిన హీరోయన్లు సినిమాల్లో పనికిరావంటూ ముద్రవేస్తారు’’ అని సంచలన వ్యాఖ్యలు చేసింది. పెళ్లి మీదున్న నా అభిప్రాయం ఇదేనంటూ ముగించింది.

తాప్పీ చేసిన ఈ వ్యాఖ్యలపై సినీ ఇండస్ట్రీలో రకరకాలుగా చర్చించుకుంటున్నారు. తాప్సీకి మన బారతదేశంలో గున్న ట్రెడిషన్ తెలియదని కొంతమంది చెప్పుకుంటే.. మరికొంతమంది మాత్రం ఆమె కేవలం తన మనసులో వున్న అభిప్రాయం మాత్రమే చెప్పిందని, ఈ విషయాన్ని అనవసరంగా రచ్చ చేయాల్సిన అవసరం లేదని అనుకుంటున్నారు. కొందరు తప్పుగా మాట్లాడిందని మండిపడుతుంటే.. మరికొందరు అభిప్రాయం వ్యక్తం చేయడంలో తప్పు లేదని లైట్ తీసుకుంటున్నారు. ఈ విషయం మీద ఇండస్ట్రీ వర్గాలు తాప్సీకి ఎలా సమాధానమిస్తాయోనని ఆసక్తిగా ఎదురుచూస్తున్నారు.