Posted: 01/31/2013 06:19 PM IST

       యంగ్ టైగర్ ఎన్టీఆర్‌ హీరోగా.... ప్రముఖ దర్శకుడు శ్రీనువైట్ల రూపొందిస్తున్న ‘బాద్ షా’ సినిమా షూటింగ్ ముగింపు దశలో వుంది. ఇటీవలే ఈ సినిమాకు సంబంధించిన పతాక సన్నివేశాలను నాగార్జునసాగర్‌ సమీపంలో భారీ ఎత్తున చిత్రీకరించారు. తాజా వివరాల ప్రకారం ఈ సినిమా బడ్జెట్ లెక్కకుమించి దాటిపోతుందని తెలుస్తోంది. ఇంతవరకూ ఈ సినిమాకు అయిన ఖర్చు 57 కోట్ల రూపాయలు దాటిందని విశ్వసనీయవర్గాల సమాచారం. భారీనిర్మాత బండ్లగణేష్ ఈ చిత్రం మీద ఖర్చుపెట్టేందుకు ఏమాంత్రం సంకోచించకుండా దర్శకునికి పూర్తి సహాయ సహకారాలు అందిస్తున్నట్టు తెలుస్తోంది.  ఎక్కువగా విదేశాల్లో షూటింగు జరపడం వల్లనే ఈ స్థాయిలో ఖర్చు అయిందని లెక్కలు చెబుతున్నాయి.
     కాగా,  ఎన్టీఆర్‌కున్న మార్కెట్‌ పరంగా ఈ బడ్జెట్‌ వర్కౌట్‌ అవుతుందా అని కొందరు సినీ విశ్లేషకులు అనుమానం వ్యక్తం చేస్తున్నారు. ఇప్పటికే కొన్ని ఏరియాల్లో రికార్డు స్థాయిలో ఈ సినిమా బిజినెస్‌ జరుగుతుండటం నిర్మాత బండ్ల గణేష్‌ కు చాలామేరకు ఊరటనిచ్చిందని తెలుస్తోంది. ఇదిలా ఉండగా, బ్లాక్ బస్టర్ మూవీగా నిలిచిన ' నాయక్', చరణ్ మరో సినిమా 'ఎవడు' విడుదలకు ముందు బిజినెస్ పరంగా సృష్టించిన రికార్డులను 'బాద్ షా' దాటుకుపోయిన సంగతి ఇక్కడ గమనార్హం.
        గతంలో 'నాయక్' విడుదలకి ముందే సీడెడ్ ఏరియా డిస్ట్రిబ్యూషన్ హక్కుల నిమిత్తం 7 కోట్ల 5 లక్షలను రాబట్టుకోగా, 'ఎవడు' సినిమా నెల్లూరు డిస్ట్రిబ్యూషన్ హక్కుల ద్వారా 1కోటి 95 లక్షలను రాబట్టుకుంది. అయితే తాజాగా 'బాద్ షా' ఆ రికార్డులను దాటిపోయింది. ఈ సినిమా సీడెడ్ ఏరియా హక్కులను శోభన్ అనే డిస్ట్రి బ్యూటర్ 8 కోట్ల 10 లక్షలకు కొనుగోలు చేసినట్లు సమాచారం. ఇక, నెల్లూరు ఏరియాకి సంబంధించిన డిస్ట్రిబ్యూషన్ హక్కుల ద్వారా 2 కోట్లు రాబట్టుకున్నట్లు తెలుస్తోంది.
     కాగా భారీ బడ్జెట్ మూవీ ‘బాద్ షా’  ఏప్రిల్ 5 న ప్రేక్షకుల ముందుకు రానుంది. బండ్లగణేష్  నిర్మాతగా వ్యవహరిస్తోన్న ఈ సినిమాలో కాజల్‌ కథానాయికగా నటిస్తుండగా, నవదీప్‌ ప్రతినాయకుడిగా కనిపించబోతున్నాడు.

...avnk