Posted: 07/16/2012 03:24 PM IST

      దివ్యభారతి... లేలేత ప్రాయంలోనే తెలుగుతెరపై అందాలొలికించి అందరి హ్రుదయాల్లో చోటు సంపాదించిన తార. పసిడి ప్రాయంలోనే దూర తీరాలకు చేరిన దివ్య జీవిత ఇతివ్రుత్తం ఇప్పుడు వెండితెరమీద కదలాడనుంది. కొందరి సినీ తారల సంచలన మరణాలమీద, వారి జీవిత ఘట్టాల ఆధారంగా ప్రస్తుతం సినిమాలు ఆవిష్కరిస్తున్నారు. ఈ నేపథ్యంలో తాజాగా ఓ దర్శకుడి చూపు దివ్య జీవితం పై పడింది. ఈ నేపధ్యంలో మరో కొత్త జీవితకథ ప్రేక్షకుల ముందుకు రాబోతోంది.
      అప్పట్లో.. దివ్య భారతి నటించిన సినిమాలన్నీ దాదాపు  సూపర్ హిట్ అయ్యాయి. ఇలా వెండి తెరమీద  వెలుగొందుతున్న సమయంలో అనుమానాస్పదంగా దివ్య చనిపోయిన సంగతి మనకు ఎరుకే. ప్రస్తుతం ఒక బాలీవుడ్ యంగ్ డైరెక్టర్ దివ్యభారతి జీవితాన్ని తెరకెక్కించాలని సన్నాహాలు చేస్తున్నాడు. కథా చర్చల దశలో ఉన్న ఈ సినిమాలో దివ్యభారతి పాత్ర కోసం కథానాయికను వెతుకుతున్నారు. ఈ యువ దర్శకుడు ఇప్పటికే ఆమెకి సంభందించిన పలు విషయాలు సేకరించి చాలా వరకూ స్ర్కిప్ట్ వర్క్ సిద్దం చేసుకున్నట్టు తెలుస్తోంది.
      ఇదే తరహాలో ఇంతకుముందు తెరకెక్కి సంచలన విజయం నమోదు చేసుకున్న సిల్క్ స్మిత జీవిత గాథ ‘ద డర్టీ పిక్చర్’ చిత్రంలో సిల్క్ స్మిత పాత్రను విద్యాబాలన్ పోషించారు, మరి ఈ చిత్రంలో ఎవరు కథానాయికగా చేయనున్నారనేది ఇంకా తేలలేదు. ఈ పాత్ర కోసం ప్రముఖ తారలు ఆసక్తి చూపుతున్నట్టు సమాచారం.
     కాగా, దివ్యభారతి తెలుగులో ‘రౌడీ అల్లుడు’, ‘అసెంబ్లీ రౌడీ’, ‘ధర్మక్షేత్రం’ మరియు ‘బొబ్బిలి రాజా’ లాంటి పలు బ్లాక్ బస్టర్ చిత్రాల్లో నటించారు. అంతేకాదు అటు బాలీవుడ్ లోనూ దివ్య చాలా యంగ్ ఏజ్ లోనే స్టార్ హీరోయిన్ గా ఎదిగి.. పిన్న ప్రాయంలోనే స్వర్గలోకాలకు చేరిపోయింది.

...avnk