Posted: 07/13/2012 08:06 PM IST

  'ఊ కొడతారా ఉలిక్కి పడతారా' చిత్రం విడుదల తేదీని ఖరారు చేసుకుంది. భారీ బడ్జెట్ తో తెరకెక్కిన ఈ సినిమాని ఆగస్టు 2 వ తేదీన విడుదల చేయనున్నట్టు నిర్మాత మంచు లక్ష్మీ ప్రసన్న ప్రకటించారు. రాఖీ పండుగ కానుకగా ఈ కుటుంబ కథా చిత్రాన్ని అందిస్తున్నట్టు ఆమె చెప్పారు. ఈ సందర్భంగా మోహన్ బాబు మాట్లాడుతూ, తమ బ్యానర్లో వచ్చిన భారీ బడ్జెట్ చిత్రాల్లో ఈ సినిమాకి మొదటి స్థానం దక్కుతుందని అన్నారు. ఈ సినిమా కోసం లక్ష్మీ ప్రసన్న విపరీతంగా ఖర్చు చేస్తూ తన ధైర్యానికి  పరీక్ష పెట్టిందని చెప్పారు. ఈ సినిమాలో ఆమె పోషించిన పాత్ర కూడా అందరి మెప్పు పొందుతుందని అన్నారు. ఇక బాలకృష్ణ - మనోజ్ ల పాత్రలను దర్శకుడు శేఖర్ రాజా అద్భుతంగా తీర్చిదిద్దాడనీ ... ఈ సినిమా ఘన విజయాన్ని సాధించి చరిత్ర సృష్టిస్తుందనే నమ్మకం తనకి ఉందని చెప్పారు. ఇదిలా ఉంటే, తమ కుటుంబంలోని కథానాయకులతో కలిసి ఓ సినిమా చేస్తే బాగుంటుందనే ఆలోచన అక్కినేని ఫ్యామిలీకి, రామానాయుడు ఫ్యామిలీకి వచ్చిన సంగతి తెలిసిందే. ఈ నేపథ్యంలోనే మోహన్ బాబు కూడా రంగంలోకి దిగినట్టుగా కనిపిస్తోంది. మంచు విష్ణు ... మనోజ్ ... లక్షీ ప్రసన్న ఈ ముగ్గురితో కలిసి నటించేందుకు మోహన్ బాబు సన్నాహాలు చేస్తున్నట్లు తెలుస్తోంది. ఇందుకు సంబంధించిన కథా చర్చలు కూడా జరుగుతున్నాయని అంటున్నారు. అయితే ఇటీవల వచ్చిన 'బోల్ బచ్చన్' అనే హిందీ చిత్రం మోహన్ బాబు కి తెగ నచ్చేయడంతో, ఎలాగైనా ఆ సినిమాని తెలుగులోకి రీమేక్ చేయాలనే పట్టుదలతో ఉన్నాడట.

...avnk