Posted: 05/31/2012 03:02 PM IST

      సంచలన దర్శకుడు రాంగోపాల్ వర్మను వై.యస్.జగన్ మోహన్ రెడ్డి బెదిరించాడంటూ విజయవాడ లోక్ సభ సభ్యుడు లగడపాటి రాజగోపాల్ వెల్లడించారు. రక్త చరిత్రలో తన పాత్ర చూపించొద్దని వర్మను జగన్ బెదిరించారని లగడపాటి ఇవాళ సంచలన వ్యాఖ్యలు చేశారు. ఆమధ్య వర్మ 'రక్త చరిత్ర' సినిమా తీసిన సమయంలో, అందులో తన పాత్రను పెట్టద్దంటూ వర్మను జగన్ భయపెట్టాడని రాజగోపాల్ పేర్కొన్నారు. ఈ విషయాన్ని తనకు రాంగోపాల్ వర్మే స్వయంగా చెప్పాడని రాజగోపాల్ అంటున్నారు. వర్మ, రాజగోపాల్ విద్యార్ధి దశ నుంచీ స్నేహితులన్న సంగతి మనకు తెలిసిందే.
      శ్రీకాకుళం ఎన్నికల ప్రచారంలో ఉన్న లగడపాటి నేడు (గురువారం) ఉదయం ఇందిరా విజ్ఞాన్ భవన్‌లో ఏర్పాటు చేసిన మీడియాతో సమావేశంలో మాట్లాడుతూ నా ఇష్టం బుక్ రిలీస్ సమయంలో ఈ విషయాన్ని వర్మే స్వయంగా తనతో చెప్పారని అన్నారు. వైఎస్సార్సీపీ మానిఫెస్టోలేని పార్టీ అని లగడపాటి వ్యాఖ్యానించారు. తన పాదయాత్రలో ఎలాంటి స్వార్థం లేదని, వైఎస్ విజయలక్ష్మి రాజకీయం చేస్తే వైఎస్ ఆత్మక్షోభిస్తుందని లగడపాటి రాజగోపాల్ పేర్కొన్నారు. రాజగోపాల్ తాజా ప్రకటనతో ఇప్పుడిది రాజకీయ , సినీ వర్గాలలో కలకలం సృష్టిస్తోంది.

...avnk