Posted: 05/15/2012 06:07 PM IST

       డమరుకం పేరుకు ఇప్పుడు పోటీ పెరిగిపోయింది. ఆర్.ఆర్.మూవీ మేకర్స్ బ్యానర్ పై నాగార్జున హీరోగా 'డమరుకం' చిత్రం రూపొందుతున్న విషయం తెలిసిందే. ప్రస్తుతం గ్రాఫిక్స్ కి సంబంధించిన పనులు జరుపుకుంటోన్న ఈ సినిమా త్వరలోనే ప్రేక్షకుల ముందుకి రానుంది. ఈ నేపథ్యంలో 'డమరుకం' పేరుతో మరో తెలుగు సినిమా నిర్మాణం జరుగుతూ వుండటం వివాదానికి దారితీసింది.
 ఆర్నవ్ మూవీస్ బ్యానర్ పై ప్రమోద్ కుమార్ నిర్మిస్తోన్న ఈ సినిమాకి నవీన్ కళ్యాన్ దర్శకుడిగా వ్యవహరిస్తున్నారు. సామాజిక సమస్యల నేపథ్యంలో ఈ సినిమా తెరకెక్కుతోంది. ప్రస్తుతం తలెత్తిన ఈ వివాదం గురించి ఈ దర్శక నిర్మాతలు మీడియా ముందుకొచ్చారు.
        2008 ఫిబ్రవరి 22 న 'డమరుకం' టైటిల్ ని ఎ.పి.ఫిలిం చాంబర్లో రిజిస్టర్ చేయించినట్టు చెప్పారు. 50 % చిత్రీకరణని జరిపాక అనుకోని కారణాల వల్ల షూటింగ్ ఆగిపోయిందనీ.. ఆ సమయంలో టైటిల్ ని రెన్యువల్ చేయించామని అన్నారు. ఇప్పుడదే టైటిల్ తో ఆర్.ఆర్. మూవీమేకర్స్ చిత్రం వస్తోండటంతో, తమకి ఫైనాన్స్ నిలిచిపోయిందని చెప్పారు. మిగతా షూటింగ్ పూర్తి చేసి జూన్లో ఈ సినిమాని విడుదల చేస్తామని అన్నారు.
      ఈ విషయమై కోర్టుకి వెళ్లగా ... ఇంగ్లిష్ టైటిల్ కి సంబంధించి రెండు టైటిల్స్ లోను అక్షరాల తేడా ఉన్నందున అభ్యంతరం లేదని కోర్టు తేల్చేసిందని చెప్పారు. ఇక ఈ వివాదం సంగతి అలా ఉంచితే, ఇంచుమించు ఈ రెండు సినిమాలు ఒకేసారి విడుదలయ్యే అవకాశాలు కనిపిస్తున్నాయి. అదే జరిగితే అందరిలోనూ గందరగోళం ఏర్పడే అవకాశం వుంది.

...avnk