Posted: 05/11/2012 04:27 PM IST

సినిమా అంతా కమర్షియల్ అయిపోయిన ఈ రోజుల్లో వచ్చే సినిమాలు సాధారణ బడ్జెట్ లో రావడం లేదు. ఐదు పది కోట్లను దాటి ఏకంగా 40 నుండి 45 కొట్లు పెట్టి తీస్తున్నారు. అందులో పెద్ద హీరోలైతే ఇంకా చెప్పనక్కర్లేదు. పెద్ద హీరోలు అనేగానే కోట్లకు కోట్లు కుమ్మరించి సినిమాలు తీసి తరువాత పెట్టిన సొమ్మును రాబట్టుకోవడానికి కొన్ని సినిమాల విడుదలకు అడ్డు పడతుంటారు. అంతే కాకుండా చిన్న నిర్మాతలకు కూడా పెద్ద హీరోలు అనగానే పెట్టిన బడ్జెట్ ఎక్కడ రాకుండా పోతుందో అని భయపడి చిన్న సినిమాల రిలీజును ఆపేస్తుంటారు.  ఇక ఇప్పుడు విడుదలకి సిద్ధంగా ఉన్న సినిమాలపై 'గబ్బర్ సింగ్' ఎఫెక్ట్ ఎక్కువగానే పడుతోంది. రామ్ - తమన్నా జంటగా తెరకెక్కిన 'ఎందుకంటే ప్రేమంట' చిత్రం కూడా ఈ నెల 11 న రిలీజ్ కావాల్సిందే.

అయితే 'గబ్బర్ సింగ్' విడుదల అదే రోజు ఉండడంతో, 'ఎందుకంటే ప్రేమంట' సినిమా తన రిలీజ్ ని వాయిదా వేసుకుంది. ఇప్పుడదే కోవలోకి 'దరువు' సినిమా కూడా వచ్చినట్టు చెబుతున్నారు. రవితేజా - తాప్సీ కాంబినేషన్లో రూపొందిన ఈ సినిమాని ఈ నెల 4 వ తేదీన విడుదల చేయాలనుకున్నప్పటికీ, అనుకోకుండా ఆ డేట్ ఈ నెల 18 కి మారింది. రవితేజా అభిమానులంతా ఆసక్తిగా ఎదురుచూస్తోన్న ఈ సమయంలో, ఇప్పుడా తేదీ 25 కి మారిందని యూనిట్ సభ్యులు చెబుతున్నారు. పోస్ట్ ప్రొడక్షన్ పనులు పూర్తి కాకపోవడమే కారణమని పైకి చెబుతున్నప్పటికీ, 'గబ్బర్ సింగ్' ఎఫెక్టే అనే వార్తలు గుప్పుమంటూనే ఉన్నాయి.