Posted: 12/14/2011 01:02 PM IST

హైద్రాబాద్ రామానాయుడు స్టూడియోస్ లో ఈ రోజు దగ్గుబాటి రానా పుట్టిన రోజు సందర్భంగా ఆ వేడుకతోపాటుగా ఒక కొత్త సినిమాను ప్రారంభించటం జరిగింది.  గమ్యం, వేదం లాంటి సున్నితమైన అంశాలతో చిత్రాలను తీసి, చిత్ర నిర్మాణంలో తనదైన విభిన్న శైలిని ప్రదర్శించిన దర్శకుడు క్రిష్ రూపొందిస్తున్న ఈ చిత్రం కృష్ణం వందే జగద్గురుం.  కోటా శ్రీనవాసరావు, పోసాని కృష్న మురళి, బ్రహ్మానందం తదితర కళాకారుల నట సహకారంతో రూపొందబోతున్న ఈ చిత్రంలోని ముఖ్య పాత్ర రానా కోసమే పుట్టిందా అన్నట్టుగా ఉంటుందని దర్శకుడు క్రిష్ అన్నారు.  నిజానికి ఈ చిత్ర కథను క్రిష్ చాలా సంవత్సరాల క్రితమే తయారు చేసి పెట్టుకున్నారు.  ఇప్పటికి ఆయన ఊహల్లోని ఆధునిక కృష్ణుడి పాత్రను తెరమీదకు తేవటానికి ఇప్పటికి సరైన కథానాయకుడు దొరికాడన్నమాట.  ఈ చిత్రానికి సంగీతాన్నందిస్తున్న కీరవాణి కూడా ఈ చిత్ర ప్రారంభోత్సవ వేడుకలో పాల్గన్నారు. 

భారతభాగవతాల్లోని శ్రీకృష్ణుడి పాత్ర అత్యంత శక్తివంతమైనది, సందేశాత్మకమైనది, మార్గదర్శకమైనది.  అటువంటి పాత్రలోని విభిన్న కోణాలను పరిగణనలోకి తీసుకుని రూపొందించిన నవీన కృష్ణ రూపంలో క్రిష్, రానాను చూపించబోతున్నారు.  వేదం, గమ్యంలో స్పృశించి, ఆలోచింపజేసిన సున్నితమైన అంశాలకంటే ఎక్కువ సందేశాత్మకంగా, మనోరంజకంగా ఈ సినిమా రూపుదిద్దుకుంటుందని ఆశించవచ్చు. 

-శ్రీజ