మృదువైన చేతులకు తేలికైన చిట్కాలు

Posted: 12/27/2014 05:10 PM IST

అందానికి అడ్రస్ గా ఉండే ఆడవారు శరీర భాగాల గురించి చాలా జాగ్రత్తలు తీసుకుంటారు. ముఖ్యంగా బయటకు కన్పించే ముఖంపై ప్రత్యేక శ్రద్ద కనబరుస్తారు. ముఖం, మెడకు ప్రత్యేక క్రీములు, ప్యాకులు వేయించుకుని జాగ్రత్తలు తీసుకుంటారు. అదేసమయంలో బయటకు కన్పించే చేతులను మాత్రం పెద్దగా పట్టించుకోరు. ముఖానికి 100 శాతం జాగ్రత్తలు తీసుకుంటే చేతులపై యాబై శాతం శ్రద్ద చూపించేవారు కొందరు. ఇంకొందరు అయితే కేవలం స్నానం చేసేటపుడు తప్ప మిగతా సమయంలో చేతులను పెద్దగా పట్టించుకోరు. ఏమవుతుంది.., ముఖం నీట్ గా ఉంది కదా అని చాలామంది అనుకుంటారు. కానీ.., ముఖంతో పాటు చేతులూ.., అమ్మాయి అందాన్ని బేరీజు వేయటంలో కీలకంగా మారతాయి. కాబట్టి చేతులను జాగ్రత్తగా కాపాడుకోవాలి.

* చేతికి ఎప్పటికప్పుడు మాయిశ్చరైజర్ రాస్తుండాలి. ముఖ్యంగా చలికాలంలో అయితే పగుళ్ల బారి నుంచి కాపాడేందుకు ప్రత్యేక శ్రద్ద చూపాలి. అయితే సహజ క్రీములను ఎక్కువగా ఆశ్రయించాలి. సౌందర్యలేపనాలను అతిగా వాడితే చర్మ సమస్యలు వచ్చే అవకాశం ఉంది.

* ఎక్కువగా పండ్లు, ఆకు కూరలు తినటం వల్ల చేతుల నిగారింపు మెరుగవుతుంది. అంతేకాకుండా అరటి, నారింజ, బొప్పాయి వంటి పండ్ల తొక్కలతో చేతులపై రుద్ది కొద్దిసేపటి తర్వాత నీటితో కడిగితే మురికి పోతుంది.

* నిమ్మరసంలో చక్కెర కలిపి చేతులకు పట్టిస్తే నున్నగా తయారవుతాయి. అదేవిధంగా పంచదార, కొబ్బరినూనె కలిపిన మిశ్రమం చేతికి మర్దనా చేసినా చేతులు నున్నగా అవుతాయి.

* గ్లిజరిన్ ను కలిపి చేతులకు రాసుకుని గంట ఆగిన తర్వాత కడిగేస్తే చేతులు మృదువుగా తయారవుతాయి.

* ఎండలో బయటకు వెళ్లేటపుడు చేతికి గ్లౌజులు తొడిగితే.., చేతుల నిగారింపు తగ్గకుండా, కాలుష్యం బారిన పడకుండా కాపాడుతుంది.