మెరుగైన జుట్టుకోసం పెరుగు వాడండి...

Posted: 10/14/2014 03:37 PM IST

ప్రస్తుతకాలంలో జుట్టు సంరక్షణకు సంబంధించి ఎన్నోరకాల కండీషనర్లు, ఇతర రసాయనాలు మార్కెట్లో లభ్యమవుతున్నప్పటికీ... వాటితో ఏదో సమస్య వస్తోందని మహిళలు బాధపడుతూ వుంటారు. నిత్యం కండీషనర్లు వాడటం వల్ల కేశాలు మృదువుగా మారి, చుండ్ర సమస్య తగ్గినప్పటికీ... జుట్టు మాత్రం అప్పుడప్పుడు రాలిపోతుందని కొంతమంది వాపోతుంటారు. ఎందుకంటే.. జుట్టుకు సహజంగా కావాల్సిన కొన్ని పోషకాలు లభించకపోవడం వల్ల ఇటువంటి ఇబ్బందులను ఎదుర్కోవాల్సి వస్తుంది. కండీషనర్ల ద్వారా జుట్టు చూడటానికి అందంగానే కనిపించినా... వాటికి కావాల్సిన పోషకాలు లభించకపోవడంతో అప్పుడప్పుడు ఏదో ఒక సమస్య రావడం తప్పదని నిపుణులు సైతం పేర్కొంటున్నారు.

మరి అటువంటి సమస్యలను అధిగమించాలంటే సహజంగానే ఎక్కువ ఔషధగుణాలు లభించే పదార్థాల ద్వారా.. జుట్టును మరింతగా మెరుగుపరుచుకోవచ్చునని చెబుతున్నారు. అందులో ఒకటి ‘‘పెరుగు’’! పెరుగులో ఉండే పోషకాలు జుట్టుకు మంచి కండీషనర్ గా పనిచేసి వెంట్రుకలకు బలాన్ని, మెరుపునూ ఇస్తాయి. అలాగే ఈ ప్యాక్స్ ఎండ, కాలుష్యాల నుంచి కూడా జుట్టును కాపాడడంలో సహాయపడుతాయి. పెరుగుతో కొన్ని హెయిర్ ప్యాక్స్ ని తయారుచేసుకుని వాటిని నిత్యం పాటిస్తే.. జుట్టును బాగా మెరుగుపరుచుకోవచ్చు. మరి ఆ ప్యాక్స్ ఏంటో ఒకసారి తెలుసుకుందాం....

1. పెరుగు : ఒక కప్పులో గడ్డపెరుగుని తీసుకుని పేస్ట్ లాగా అయ్యేంతవరకు బాగా కలుపుకోవాలి. దీనిని జుట్టుకు, మాడుకు పట్టించి, ఒక మాస్క్ లాగా వేసుకోవాలి. తర్వాత తలచుట్టూ ఒక కాటన్ టవల్ చుట్టుకొని అరగంటపాటు అలాగే వుంచుకోవాలి. తర్వాత తక్కువ గాఢతగల షాంపూతో తలస్నానం చేసి, కండీషనర్ ను అప్లై చేసుకోవాలి. దీంతో జుట్టు మృదువుగా వుండటంతోపాటు కాంతివంతంగా మెరుస్తుంది కూడా!

2. తేనె - పెరుగు మిశ్రమం : ముందుగా గడ్డపెరుగులో కొద్దిగా నిమ్మరసం, తేనె వేసి బాగా మిక్స్ చేసుకోవాలి. ఈ మిశ్రమాన్ని జుట్టు కుదుళ్లనుంచి చివర్ల బాగా అప్లై చేసుకోవాలి. అరగంట తర్వాత తక్కువ గాఢతగల షాంపుతో తలస్నానం చేసి, కండీషనర్ ను అప్లై చేసుకోవాలి. ఇలా వారానికి రెండుసార్లు చేసుకుంటే... త్వరలోనే మంచి ఫలితాన్ని గుర్తించవచ్చు.

3. ఆలివ్ ఆయిల్ - పెరుగు మిశ్రమం : ఒక కప్పు పెరుగు తీసుకుని అందులో ఆలివ్ ఆయిల్ వేసి బాగా మిక్స్ చేసుకోవాలి. దీనిలోనుంచి కాస్త మిశ్రమాన్ని మాడుపై వేసి, ఓ 10 నిముషాలు మసాజ్ చేసుకోవాలి. తర్వాత మిగిలిన పేస్ట్ తో జుట్టు మొత్తం అప్లై చేసుకోవాలి. అరగంట తర్వాత తక్కువ గాఢతగల షాంపుతో తలస్నానం చేసుకోవాలి. వారానికి రెండుసార్లు చేసుకుంటే.. మంచి ఫలితం దక్కుతుంది.

4. మినుములు - పెరుగు మిశ్రమం : ముందుగా మినుముల్ని రాత్రంగా నానబెట్టుకొని, ఉదయాన్నే మెత్తటి పేస్ట్ లా చేసుకోవాలి. ఈ పేస్ట్ ని పెరుగులో వేసి బాగా కలుపుకోవాలి. ఈ మిశ్రమాన్ని మాడుకు, జుట్టు మొత్తానికి రాసుకోవాలి. అరగంట తర్వాత తక్కువ గాఢతగల షాంపూతో తలస్నానం చేసుకోవాలి. వారానికి రెండుసార్లు ఇలా చేసుకుంటే మంచిది.

5. మెంతులు - పెరుగు మిశ్రమం : మెంతుల్ని మిక్సీలో వేసి, పొడిగా తయారుచేసుకోవాలి. ఈ పొడిని పెరుగులో వేసి బాగా కలియపెట్టి పేస్ట్ లా చేసుకోవాలి. దీనిని జుట్టు మొదళ్ళనుంచి చివర్లదాకా, మాడుకు పట్టించి గంటపాటు వుంచుకోవాలి. తర్వాత తక్కువ గాఢత గల షాంపూతో తలస్నానం చేసుకోవాలి. అనంతరం కండీషనర్ రాసుకోవాలి. అయితే పొడిగా వున్న జుట్టు సమస్యతో బాధపడుతున్నవారికి మాత్రమే ఇది చాలామంచిది. వారానికి రెండుసార్లు చేసుకోవాలి.