సంగీత దర్శకుడు చక్రి మృతిపై ప్రముఖుల విచారం

Posted: 12/15/2014 09:29 AM IST

ప్రముఖ సినీ సంగీత దర్శకుడు చక్రి మరణం పట్ల పలువురు సినీ, రాజకీయ ప్రముఖులు విచారం వ్యక్తం చేశారు. చక్రి మరణం పట్ల తెలంగాణ ముఖ్యమంత్రి దిగ్బ్రాంతి వ్యక్తం చేశారు. ఇండస్ట్రీకి ఆయనమరణం తీరని లోటన్నారు. తెలంగాణ బిడ్డ ఎన్నో విజయాలు సాధించాడని కొనియాడారు. అంతేకాకుండా తెలంగాణ ఉద్యమ నేపథ్యంగా వచ్చిన ‘జై బోలో తెలంగాణ’ సినిమాకు సంగీతం అందించాడనిగుర్తు చేసుకున్నారు. అటు పలువురు సినీ ప్రముఖులు కూడా చక్రి మృతి పట్ల విచారం వ్యక్తం చేశారు.

చక్రి (40) అలియాస్ చక్రధర్ గిల్ల ఇక లేరు. గుండెపోటుతో సోమవారం తెల్లవారుజామున  తిరిగిరాని లోకాలకు వెళ్లారు. చక్రికి గుండెపోటు రావటంతో కుటుంబ సభ్యులు అపోలో ఆస్పత్రికి తీసుకెళ్ళారు.ఐసీయూలో చికిత్స పొందుతూ ఈ ఉదయం తుదిశ్వాస విడిచారు. వరంగల్ జిల్లా మహబూబాబాద్ కు చెందిన చక్రి పూరి జగన్నాధ్ డైరెక్షన్ లో వచ్చిన ‘బాచి’ సినిమాతో సంగీత దర్శకుడిగా కెరీర్

ప్రారంభించారు. ‘ఇడియట్’, ‘ఇట్లు శ్రావణి సుబ్రహ్మణ్యం’, ‘అవును వాళ్లిద్దరూ ఇష్టపడ్డారు’, ‘దేశ ముదురు’, ‘సత్యం’, ‘గోపి గోపిక గోదావరి’, ‘సింహ’ వంటి సినిమాలకు సంగీతం అందించారు. కెరీర్లో 85 సినిమాలకు  సంగీత దర్శకుడిగా పనిచేశారు. ‘సింహ’ సినిమాకు ఉత్తమ సంగీత దర్శకుడిగా నంది అవార్డు అందుకున్నారు. చివరగా సంగీతం అందించిన ‘రేయ్’ సినిమా విడుదల కావాల్సి ఉంది.

 

కార్తిక్