జగన్ అందుకు అర్హుడే కాడట!

Posted: 12/05/2014 10:07 PM IST

Tdp minister devineni uma maheswara rao fires ys jagan mohan reddy maha dharna vizag hudhud cyclone

వైఎస్సార్ కాంగ్రెస్ పార్టీకి, టీడీపీకి మధ్య ఎప్పటినుంచో పచ్చగడ్డి వేస్తే భగ్గుమనే శత్రుత్వం వున్న విషయం తెలిసిందే! ఒకరిమీదొకరు నిందలు వేసుకోవడమే పనిగా మార్చేసుకున్నారు ఆ పార్టీ నేతలు! ఇందులో భాగంగానే వైఎస్సార్సీపీ అధినేత జగన్ ఆంధ్రప్రదేశ్ ప్రభుత్వానికి వ్యతిరేకంగా విశాఖ జిల్లాల మహాధర్నాను చేపట్టిన విషయం తెలిసిందే! ఈ ధర్నా నేపథ్యంలో ఆయన చంద్రబాబు సర్కార్ మీద నానారకాలుగా ఆరోపణలు చేశారు. తప్పుడు హామీలతో ప్రజలకు మోసం చేశారని, హుదూద్ తుపాను సమయంలో ఎటువంటి సహాయక చర్యలు తీసుకోలేదని, ప్రజలకోసం ఏం చేశారని ఎన్నో ప్రశ్నలను సంధించారు.

అందుకు బదులుగా తాజాగా జగన్ ధర్నాపై టీడీపీ మంత్రి దేవినేని ఉమామహేశ్వరరావు మండిపడ్డారు. హైదరాబాద్’లో ఆయన మాట్లాడుతూ.. జగన్’కు ప్రభుత్వాన్ని విమర్శించే హక్కేలేదన్నారు. హుదూద్ తుపాను టైంలో సహాయకచర్యలు అందలేదని ఆయన పేర్కొనడంపై మంత్రి దుమ్మెత్తిపోశారు. తుపాను సమయంలో 64 ఏళ్ల వయసులో ముఖ్యమంత్రి ఏం చేశారో విశాఖవాసులందరికీ తెలుసని ఆయన తెలిపారు. వైఎస్సార్సీపీ చేపట్టిన ధర్నాలో పార్టీ శ్రేణులు తప్ప రైతులు పాల్గొన్నారా? అని ఆయన ప్రశ్నించారు. 16 వేల కోట్ల రూపాయల లోటు బడ్జెట్ లో ఉండి కూడా రుణమాఫీ చేశామని ఆయన సూచించారు.

తెలంగాణలో వైఎస్సార్సీపీ జెండా పీకేశారని, పార్టీ కార్యాలయం ఎక్కడుందో జగన్ చిరునామా చెప్పాలని ఆయన డిమాండ్ చేశారు. తెలంగాణ ముఖ్యమంత్రి ఆంధ్రవ్యతిరేక ప్రచారంపై జగన్ ఏనాడైనా ఒక్క మాట మాట్లాడారా? రాష్ట్ర వ్యతిరేక వ్యాఖ్యలు, పనులు చేస్తున్నా కేసీఆర్ ను తప్పుపట్టే ధైర్యం జగన్ కు లేదని ఆయన విమర్శించారు. పార్టీ నుంచి జారిపోతున్న నేతలను కాపాడుకునేందుకే జగన్ ధర్నా చేశారని ఆయన విమర్శించారు.