అగ్రస్థానంతో అరుదైన రికార్డు సాధించిన సుష్మా

Posted: 12/05/2014 04:06 PM IST

భారత విదేశాంగ శాఖ మంత్రి సుష్మాస్వరాజ్ రికార్డు సృష్టించారు. ప్రపంచంలోనే అతి ఎక్కువ మంది ఫాలో అవుతున్న విదేశాంగ శాఖ మంత్రులలో ఆమె ప్రధమ స్థానాన్ని అక్రమించారు. మైక్రో బ్లాగింగ్ సైట్ ట్వీట్టర్‌లో అత్యధిక మంది అనుసరిస్తున్న విదేశాంగ శాఖ మంత్రిగా సుష్మా స్వరాజ్ రికార్డు సాధించారు. ప్రపంచ వ్యాప్తంగా ట్వీట్టర్‌లో ఎక్కువ మంది అనుసరిస్తున్న ప్రధాన మంత్రుల్లో భారత దేశ ప్రధాని నరేంద్రమోడీ మూడవ స్థానం అక్రమించారు. మహా దిగ్గజాలను వెనక్కు తోసి ప్రపంచస్థాయి నేతగా ప్రధాని నరేంద్ర మోదీ కొనసాగుతున్న విషయం తెలిసిందే.  అమెరికా అధ్యక్షుడు బరాక్ ఒబామా, పోప్ ఫ్రాన్సిస్‌ల తర్వాతి స్థానంలో ఉన్న మోదీని ట్వీట్టర్‌లో 83.9 లక్షల మంది ఫాలో అవుతున్నారు.

ఈ విషయంలో భారత విదేశాంగ శాఖ మంత్రి సుష్మాస్వరాజ్ మాత్రం అగ్రస్థానంలో నిలిచారు. మొత్తం 17, 37,804 మంది అనుసరిస్తుండటంతో ఆమె మొదటి స్థానంలో ఉన్నారు.  యూఏఈ విదేశాంగ మంత్రి జాయేద్ 13, 80,574 మందితో రెండవస్థానంలో,  వెనెజులా విదేశాంగ మంత్రి జువా మిరాండా 7,58,198 మందితో మూడవ స్థానంలో నిలిచారు.  నవంబరు చివరినాటికి ఉన్న ఫాలో అయ్యేవారి సంఖ్య ఆధారంగా ఈ ర్యాంకులు కేటాయించినట్లు ట్వీటర్ వెల్లడించింది.

జి. మనోహర్