నిరంజన్ జ్యోతి రాజీనామా చేసే ప్రసక్తే లేదు..

Posted: 12/03/2014 04:14 PM IST

వివాదాస్పద వ్యాఖ్యలు చేసిన కేంద్ర సహాయ మంత్రి సాధ్వీ నిరంజన్ జ్యోతి తన పదవికి రాజీనామా చేసే ప్రసక్తే లేదని కేంద్ర మంత్రి వెంకయ్యనాయుడు స్పష్టం చేశారు. నిరంజన్ జ్యోతి వివాదాస్పద వ్యాఖ్యలపై ఇవాళ కూడా పార్లమెంట్ ఉభయ సభల్లో విపక్షాలు ఆందోళన కొనసాగించాయి. తక్షణం సాథ్వీ నిరంజన్ జ్యోతి కేంద్ర మంత్రి పదవికి రాజీనామా చేయాలని డిమాండ్ చేశాయి. సభలో సమావేశాలు సజావుగా సాగనీయకుండా అడ్డుకున్నాయి. కాంగ్రెస్, బీఎస్పీ, తృణముల్ కాంగ్రెస్, సమాజ్ వాధీ, ఆర్జేటీ, జేడీయు సభ్యులు ఉభయ సభల్లోనూ సమావేశాలకు అడ్డు తగిలారు.

దీనిపై స్పందించిన కేంద్ర మంత్రి వెంకయ్యనాయుడు ఎట్టి పరిస్థితుల్లో మంత్రి సాథ్వి నిరంజన్ జ్యోతి తన పదవికి రాజీనామా చేయరని తేల్చిచెప్పారు. ఉభయ సభల్లోనూ తన వ్యాఖ్యల పట్ల అమె విచారం వ్యక్తం చేస్తూ క్షమాపణలు చెప్పారని గుర్తుచేశారు. ప్రధాన మంత్రి సమక్షంలోనే సాథ్వి నిరంజన్ జ్యోతి క్షమాపణలు చెప్పారని గుర్తుచేశారు. భేషరుతుగా క్షమాపణలు చెప్పిన తరువాత కూడా.. ఇంకా మంత్రి పదవికి రాజీనామా చేయాలని విపక్షాలు డిమాండ్ చేయడం సముచితం కాదన్నారు. ఢిల్లీ ఎన్నికల ప్రచారంలో భాగంగా సాధ్వీ నిరంజన్ జ్యోతి 'రామరాజ్యం వైపు ఉంటారా? లేక అసాంఘిక శక్తుల వైపు ఉంటారా..? ఢిల్లీ ప్రజలే నిర్ణయించుకోవాలి' అంటూ అసభ్య పదజాలాన్ని వాడటంతో వివాదానికి తెరలేచింది.

జి. మనోహర్