దేశ రక్షణకు మంచి నిఘా వ్యవస్థ అవసరం వుంది..

Posted: 11/30/2014 01:32 PM IST

Good intelligence system a must for nation s defence says pm narendra modi at key security meet

దేశ భద్రతలో నిఘా వ్యవస్థలది కీలకపాత్ర అని ప్రధాన మంత్రి నరేంద్రమోదీ అన్నారు. గౌహతిలో జరుగుతున్న అన్ని రాష్ట్రాల డీజీపీల సమావేశంలో ఆయన పాల్గొని ప్రసంగించారు. రెండు రోజులుగా గౌహతిలో కొనసాగుతున్న ఈ సమావేశంలో దేశ భద్రతకు సంబంధించి కీలక అంశాలను చర్చిస్తున్నారు. ఉగ్రవాదం, చొరబాట్లను అరికట్టడంపై ఎక్కువగా దృష్టిసారిస్తున్నారు. స్వాతంత్ర్యం వచ్చాక 33 వేలమంది పోలీసులు విధి నిర్వహణలో ప్రాణాలు కోల్పోయారని అన్నారు. అమరులైన పోలీసుల త్యాగం వృథా కారాదన్నారు. అమరులైన పోలీసుల కథనాలతో ఈ-బుక్‌లు తీసుకొస్తే .. ఇతరులకుస్ఫూర్తిగా నిలుస్తాయన్నారు.

దేశ భద్రతలో నిఘా వ్యవస్థ కీలకమైనది పేర్కొన్నారు. పటిష్టమైన నిఘా వ్యవస్థ కలిగి ఉంటే ఆయుధాలే అవసరం లేదన్నారు. సరైన ఆయుధాలు, సరైన వ్యక్తి వద్ద ఉండాలని సూచించారు. పోలీసు కుటుంబాల సంక్షేమం చూడాల్సిన బాధ్యత కూడా మనపై ఉందని సూచించారు. ఈశాన్య రాష్ట్రాలకు నైతిక మద్దతుగా ఇక్కడ సమావేశం నిర్వహిస్తున్నట్లు చెప్పారు. ప్రతి పోలీస్‌స్టేషన్‌లో వెబ్‌సైట్ ఉండాలని ఆదేశించారు. పోలీస్‌స్టేషన్ వెబ్‌సైట్‌లో ప్రజలకు అందించిన సేవల వివరాలు ఉండాలని సూచించారు. సమావేశంలో కేంద్ర హోంశాఖమంత్రి రాజ్‌నాథ్‌సింగ్‌తో పాటు అన్ని రాష్ట్రాల డీజీపీలు, హోంశాఖ ఉన్నతాధికారులు పాల్గొన్నారు.

జి. మనోహర్