చంద్రబాబు విదేశీ పర్యటనలపై విచారణ జరపాలి..

Posted: 11/26/2014 08:58 AM IST

Ycp demands inquiry into andhra pradesh chief minister chandrababu foreign tours

ఆంధ్రప్రదేశ్ ముఖ్యమంత్రి చంద్రబాబు చేస్తున్న విదేశీ పర్యటనలపై సమగ్ర దర్యాప్తు నిర్వహించాలని వైసీపీ పార్టీ డిమాండ్ చేసింది. రాజధాని నిర్మాణం కోసం పేదల మొదలకుని సంపన్నుల వరకు విరాళాలు సేకరిస్తున్న ముఖ్యమంత్రి.. రాజధాని నిర్మాణ విషయాన్ని పక్కన బెట్టి ప్రజాధనంతో విదేశీ పర్యటనలకు వెళ్లడంపై వైసీపీ ఎమ్మెల్యే శ్రకాంత్ రెడ్డి మండిపడ్డారు. పార్టీ కార్యాలయంలో ఆయన విలేకరులతో మాట్లాడారు. రాష్ట్రంలో ప్రజలు అల్లాడిపోతుంటే ముఖ్యమంత్రి మాత్రం విదేశాల్లో సరదా పర్యటనలకు వెళుతున్నారని విమర్శించారు.

చంద్రబాబు మళ్లీ ముఖ్యమంత్రి అవుతారని ఊహించలేదని, అలాంటిది ప్రజలు ఆయనకు పట్టం కట్టే సరికి ఆయన తన విదేశీ పర్యటనలన్నీ ఇప్పుడే ముగించుకోవాలని చూస్తున్నారని ఎద్దేవా చేశారు. ముఖ్యమంత్రి విదేశీ పర్యటనలు శృతిమించిపోతున్నాయని, ప్రజలకు పాలన అందించడంలో విఫలమైన ముఖ్యమంత్రికి.. ఆయన పార్టీ నేతల చర్యలను ప్రజలు గమనిస్తున్నారని చెప్పారు. అవకాశం లభించినప్పడు ప్రజలు ఆయనకు తగిన గుణపాఠం నేర్పుతారని దుయ్యబట్టారు. చంద్రబాబు జపాన్ పర్యటనకు వెళ్లేందుకు రూ.1.5 కోట్లు ముందస్తుగా విడుదల చేస్తూ జీఓలు జారీ చేయడంపై కూడా శ్రీకాంత్ రెడ్డి మండపడ్డారు.

జి.మనోహర్