మా వల్లే అంతర్జాతీయ విమానాశ్రయం వచ్చింది..

Posted: 11/22/2014 04:39 PM IST

Shamshabad international airport came because of us only says andhra pradesh chief minister chandrababu

శంషాబాద్ విమానాశ్రయం టీడీపీ వల్లే వచ్చిందని ఆంధ్రప్రదేశ్ ముఖ్యమంత్రి చంద్రబాబు అన్నారు. దేశీయ టెర్మినల్కు ఎన్టీఆర్ పేరు పెట్టింది తామేనని తెలిపారు. శంషాబాద్ విమానాశ్రయంలో దేశీయ టెర్మినల్‌కు ఎన్టీఆర్ పేరు పెట్టాలన్న నిర్ణయాన్ని వెనక్కి తీసుకోవాలని తెలంగాణ అసెంబ్లీలో తీర్మానం చేయడం అర్ధరహితమన్నారు. ఎన్టీఆర్ లాంటి మహానేతకు కూడా ప్రాంతీయ తత్వాలను అంటగట్టడం సహేతుకం కాదన్నారు, తెలుగువారి ఖ్యాతిని నలుదిశలా వ్యాపింపజేసిన ఎన్టీయార్ లాంటి గోప్ప వ్యక్తిని ఒక ప్రాంతానికే పరిమితం చేయడం సరికాదన్నారు. తాము అధికారంలో ఉన్నప్పుడు రాజీవ్ గాంధీ పేరు మార్చే అవకాశం ఉన్నా సంప్రదాయాన్ని అనుసరించి పేరు మార్చలేదని గుర్తు చేశారు.

టీడీపీ అధికారంలోకి వస్తే ఎన్టీఆర్ పేరు పెడతామని 2009లోనే చెప్పామని చంద్రబాబు అన్నారు. ఇప్పుడున్న నేతలు ఎన్టీఆర్ వల్లే రాజకీయాల్లోకి పైకొచ్చారని ఆయన వ్యాఖ్యానించారు. పేదవారి హక్కుల్ని కాపాడింది ఎన్టీఆరేనని ప్రశంసించారు. కేసీఆర్, జానారెడ్డిలకు రాజకీయ భిక్ష పెట్టింది ఎన్టీఆరేనని చంద్రబాబు అన్నారు. నూతన రాజధానిలో కొమురం భీం, చాకలి అయిలమ్మ, పీవీ నరసింహారావు పేర్లు గుర్తిండిపోయేలా చర్యలు తీసుకుంటామన్నారు. తెలంగాణ శాసనసభలో టెర్మినల్కు ఎన్టీఆర్ పేరు పెట్టొద్దంటూ తీర్మానం చేసి తెలుగు ప్రజలను అవమానించారని చంద్రబాబు ఆవేదన వ్యక్తం చేశారు. అంతకు ముందు ఆయన... ఎన్టీఆర్ ఘాట్ వద్ద ఎన్టీఆర్కు నివాళులు అర్పించారు.

జి.మనోహర్