రాష్ట్రపతి పాలన విధించే ధైర్యముందా..?

Posted: 11/22/2014 04:25 PM IST

పశ్చిమబెంగాల్ ముఖ్యమంత్రి మమతాబెనర్జీకి ఆగ్రహం వచ్చినా, అనుగ్రహం వచ్చినా పట్టడం కష్టమే. ఆమెకు కేంద్రంప్రభుత్వంపై ఎక్కడలేని కోపం వచ్చింది. పశ్చిమ బెంగాల్ రాష్ట్రంలో రాష్ట్రపతి పాలన విధిస్తారా..? మీకు ఆ ధైర్యం వుందా అంటూ అమె సవాల్ విసిరారు. కట్టలు తెంచుకునే స్థాయిలో వచ్చిన కోపానికి కారణం తమ ఎంపీ శ్రీంజయ్ బోస్ అరెస్టేనట. సెక్యులరిజం మీద ఏర్పాటైన సదస్సుకు హాజరుకావడం వల్లే తమ పార్టీ ఎంపీ శ్రింజయ్ బోస్ను అరెస్టు చేశారని మమతా బెనర్జీ ఆరోపించారు. ఇలాంటి సదస్సులకు వేలసార్లు తాను హాజరవుతానని స్పష్టం చేశారు. దమ్ముంటే పశ్చిమబెంగాల్లో రాష్ట్రపతి పాలన విధించాలని సవాలు విసిరారు.  

తమపై దాడి చేయడానికి ప్రయత్నిస్తే తాము ప్రతిఘటిస్తామని, అన్ని రకాల సవాళ్లను ఎదుర్కోడానికి తాను సిద్ధమని సవాలు చేశారు. ఇక సీబీఐ తీరుపై కూడా మమతాబెనర్జీ తీవ్రస్థాయిలో మండిపడ్డారు. సీబీఐపై ఎన్నిసార్లు ఎన్ని కేసుల్లో న్యాయస్థానాలు మొట్టికాయుల వేశాయో వారే గుర్తు చేసుకోవాలన్నారు. గడిచిన ఆరు నెలల్లో దేశవ్యాప్తంగా అనేక అల్లర్లు జరిగాయన్నారు. ఈ దేశాన్ని నడపడం అంత సులభం కాదంటూ బీజేపీకి కూడా హెచ్చరిక జారీ చేశారు.

జి.మనోహర్