బిజీ షెడ్యూల్ తో ఢిల్లీ వెళ్ళిన చంద్రబాబు

Posted: 11/21/2014 07:44 AM IST

ఏపీ ముఖ్యమంత్రి చంద్రబాబునాయుడు ఢిల్లీకి వెళ్ళారు. ఈ ఉదయం శంషాబాద్ విమానాశ్రయం నుంచి ఢిల్లీకి వెళ్ళిన చంద్రబాబు.., ఒక్కరోజు పర్యటనలో బిజీగా గడపనున్నారు. కేంద్ర జలవనరుల శాఖ మంత్రి ఉమా భారతితో భేటీ అయి పోలవరం ప్రాజెక్టుపై చర్చించనున్నారు. అదేవిధంగా నదుల అనుసంధానంపై కేంద్రం నిర్వహిస్తున్న ‘జలమంథన్’ పాల్గొని ప్రసంగిస్తారు. రైల్వే శాఖ మంత్రి సురేశ్ ప్రభుతో మధ్యాహ్నం సమావేశమై.., రాష్ట్రంలోని పెండింగ్ రైల్వే ప్రాజెక్టులపై చర్చించనున్నారు.

ఇక సాయంత్రం గం.4.30కు ఆర్థిక మంత్రి అరుణ్ జైట్లీతో సమావేశం అవుతారు. ఈ భేటిలో తెలంగాణ బిల్లులో కేటాయించిన విధంగా కేంద్రం నుంచి రాష్ట్రానికి రావాల్సిన ఆర్థిక సాయం, పన్ను ప్రోత్సాహకాలపై ప్రస్తావించనున్నారు. కేంద్ర పర్యావరణ శాఖ మంత్రి రవిశంకర్ ప్రసాద్ నూ బాబు కలుస్తారని తెలుస్తోంది. సాయంత్రం 6 గంటలకు కేంద్ర ఉపరితల రవాణ శాఖ మంత్రి నితిన్ గడ్కరీతో సమావేశమై.., కొత్త రాజధాని నుంచి ఇతర ప్రాంతాలకు రోడ్డు మార్గాల ఏర్పాటు తదితరాలపై ఆయనతో చర్చిస్తారు. హస్తిన పర్యటనలో చంద్రబాబుతో కేంద్ర వాణిజ్య శాఖ మంత్రి నిర్మలా సీతారామన్ కూడా సమావేశం కానున్నారు. ఇలా ఒక్కరోజు పర్యటన ముగించుకుని రాత్రి 9గంటలకు ఢిల్లీ నుంచి బాబు తిరుగుపయనం అవుతారని ఏపీ ప్రభుత్వ వర్గాలు వెల్లడించాయి.

 

కార్తిక్