హైదరాబాద్లో తలదాచుకున్న ఉగ్రవాది ఖలీద్, అరెస్ట్

Posted: 11/18/2014 01:48 PM IST

హైదరాబాద్ మళ్లీ వార్తల్లోకి ఎక్కింది. ఉగ్రవాదులకు రహస్య స్థావరంగా హైదరాబాద్ మారిందనడానికి మరో ఉదాహరణ ఇది. బర్ద్వాన్ పేలుళ్ల కేసులో ఉగ్రవాది ఖలీద్ను హైదరాబాద్ లోనే జాతీయ దర్యాప్తు సంస్థ ఎన్ఐఏ  అరెస్ట్ చేసింది. అతని వద్ద నుంచి పేలుడు పదార్ధాలతో పాటు బాంబు సామాగ్రిని స్వాధీనం అధికారులు చేసుకున్నారు. ఈ ఏడాది అక్టోబర్ 2న జరిగిన పేలుళ్లలో ఇద్దరు మృతి చెందిన ఘటనపై దర్యాప్తు సాగిస్తున్న ఎన్ఐఏ.. హైదరాబాద్ లో ఖలీద్ తలదాచుకున్నట్లు పక్కా సమాచారం అందుకున్న ఎన్‌ఐఏ అధికారులు అతడిని అదుపులోకి తీసుకున్నారు.

ఈ కేసులో ప్రధాన నిందితుడు సాజిద్‌ను పశ్చిమ బెంగాల్  పోలీసులు ఇప్పటికే అరెస్ట్ చేశారు. జమాత్ ఉల్ ముజాహిదీన్ బంగ్లాదేశ్ (జెఎంబి) ఉగ్రవాద సంస్థ చీఫ్ కమాండర్ అయిన సాజిద్‌పై ఎన్ఐఏ రూ. పది లక్షల రివార్డును ప్రకటించిన విషయం తెలిసిందే. పశ్చిమ బెంగాల్ బుర్ద్వాన్ పట్టణంలోని ఖాగ్రాగఢ్‌లోని ఓ ఇంటిలో.. అక్టోబర్ రెండో తేదీన పేలుడు సంభవించి షకీల్ అహ్మద్ అనే వ్యక్తి అక్కడికక్కడే మృతి చెందగా, మరో వ్యక్తి సోవన్ మండల్ ఆసుపత్రిలో చికిత్స పొందుతూ మృతి చెందాడు. వీరిద్దరికీ జెఎంబి ఉగ్రవాద సంస్థతో సంబంధాలు ఉన్నాయని పోలీసులు అనుమానిస్తున్నారు. కేసు దర్యాప్తును చేపట్టిన ఎన్ఐఏ ఇవాళ హైదరాబాద్ లో అరెస్టు చేసింది. గత నెల రోజుల నుంచి ఖలీద్ హైదరాబాద్ లోనే తలదాచుకున్నట్లు ఎన్ఐఏ అధికారులు నిర్ధారణకు వచ్చారు. అయితే ఉగ్రవాది ఖలీద్ ఎక్కడెక్కడా సంచరించాడన్న విషయాలపై ఎన్ఐఎ అధికారులు దృష్టి సారించారు.

జి.మనోహర్