తెలంగాణ అభివృద్ధికే తొలి ప్రాధాన్యం..

Posted: 11/16/2014 08:22 PM IST

Telangana and unorganized workers development is my first priority says bandaru dattatreya

తెలంగాణ రాష్ట్ర అభివృద్దికే తాను మొదటి ప్రాధాన్యమిస్తానని కేంద్ర మంత్రి బండారు దత్తాత్రేయ అన్నారు. శ్రమయేవ జయతే పథకంతో కార్మికులకు న్యాయం చేస్తామని, కార్మికుల సంక్షేమ పథకాలు నేరుగా అందించే ప్రయత్నం చేస్తామని దత్తాత్రేయ చెప్పారు. అలాగే అసంఘటిత కార్మికుల సంక్షేమంపైనే తన దృష్టంతా వుందన్నారు. రాష్ట్ర గవర్నరు నరసింహన్ ను కలిసిన అనంతరం మీడియాతో మాట్లాడుతూ 42 కోట్ల మంది అసంఘటిత రంగాల్లో పనిచేస్తున్నారని, వారిలో నైపుణ్యాలు పెంచాల్సి ఉందని పేర్కొన్నారు. కార్మికుల రక్షణ చట్టాలను పటిష్ఠంగా అమలుచేస్తామన్నారు.

పారిశ్రామిక రంగాన్ని ఎక్కువగా ప్రోత్సహించాల్సి ఉందని, పరిశ్రమలు పెరిగితే ఉపాధి అవకాశాలు పెరుగుతాయని దత్తాత్రేయ పేర్కొన్నారు. నిపుణులైన కార్మికులు అవసరమని ఆస్ట్రేలియా కోరిందని, అక్కడ గని కార్మికులు పెద్ద సంఖ్యలో కావాలని ఆయన చెప్పారు. పిల్లల్లో చిన్న నాటినుంచే వృత్తివిద్యను బోధించాలని, అప్పుడే నిపుణులు తయారవుతారని దత్తాత్రేయ అభిప్రాయపడ్డారు. హైదరాబాద్ ఎంఎంటీఎస్ రెండో దశ పూర్తి చేయించే బాధ్యత తీసుకుంటానని తెలిపారు. మెట్రో రైలు తన కలల ప్రాజెక్ట్ అని అన్నారు. తెలంగాణలో బీడీ కార్మికుల గృహనిర్మాణానికి లక్ష రూపాయలు ఇచ్చేందుకు చర్యలు తీసుకుంటానని దత్తాత్రేయ చెప్పారు.

జి మనోహర్