అక్టోబర్ 2.. ఒక వ్యక్తికి కాదు శకానికే జన్మనిచ్చింది..

Posted: 11/16/2014 04:41 PM IST

Prime minister narendra modi unveils the statue of mahatma gandhi in brisbane

ప్రపంచానికి గాంధీ సిద్ధాంతాలు నేటికీ అనుసరణీయమని ప్రధాని నరేంద్రమోదీ అన్నారు. ఆస్ట్రేలియాలోని బ్రిస్బేన్‌లో ఏర్పాటు చేసిన మహాత్మాగాంధీ విగ్రహాన్ని ఆయన అవిష్కరించారు. ఈ సందర్భంగా ఆయన మాట్లాడుతూ..అక్టోబర్ 2 గాంధీ జయంతి మాత్రమే కాదని... గాంధీ వంటి వ్యక్తితో ఒక నూతన శకమే ఆరంభమైందన్నారు. తాను గాంధీ సూత్రాలను ఆచరిస్తున్నానని చెప్పారు. తాను గుజరాత్ ముఖ్యమంత్రిగా ఉన్నప్పటి నుంచీ గాంధీ సూత్రాలను తూచా తప్పకుండా పాటిస్తున్నట్లు వెల్లడించారు.

మహాత్మాగాంధీ ప్రకృతిని ఎంతగానో ఆరాధించేవారన్నారు. అందుకోసమే భారత్ దేశంలో తాను గాంధీ జయంతిని పురస్కరించుకుని స్వచ్ఛ భారత్ అనే కార్యక్రమాన్ని ప్రారంభించినట్లు చెప్పారు. ప్రపంచాన్ని వేధిస్తున్న రెండు ప్రధాన సమస్యల్లో మొదటిది గ్లోబల్ వార్మింగ్, రెండోది ఉగ్రవాదమని పేర్కొన్నారు. ఉగ్రవాదానికి కులం, మతం, ప్రాంతం అనే భేధాలు వుండవన్నారు. ఉగ్రవాదానికి వ్యతిరేకంగా ప్రపంచ దేశాలు ఏకం కావాలన్నారు. భారతీయ సంస్కృతిని గౌరవిస్తున్నందుకు బ్రిస్బేన్ మేయర్‌కు ఈ సందర్బంగా మోదీ ధన్యవాదాలు తెలిపారు.

జి.మనోహర్