కొంప కొల్లేరు చేసిన నాగుపాము

Posted: 11/15/2014 03:34 PM IST

ప్రజల దృష్టిలో నాగుపాము పుట్టలో ఉంటే దైవం. అదే ఇంటికి వస్తే మాత్రం భయంతో వణికిపోతారు. సరిగ్గా నల్గొండ జిల్లాలోని ఓ కుటుంబం ఇదే తరహా పరిస్థితిని ఎదుర్కుంది. తుర్కపల్లి మండలం ముల్కపల్లికి చెందిన గుండెబోయిన చంద్రయ్య, మంజుల దంపతుల పెంకుటింట్లోకి ఓ నాగుపాము వచ్చింది. ఇంటి గొడలు, ఇతర ప్రాంతాల్లో ఉండే ఎలుకల్ని తింటూ ఏకంగా ఇంట్లోనే తిష్ట వేసింది. పగలు, రాత్రి అనే తేడా లేకుండా ఇంట్లో పాము తిరగటం మొదలు పెట్టింది.

ఇలా పాము ఇంట్లో తిరుగుతుండటంతో చంద్రయ్య కుటుంబం తీవ్ర భయాందోళనకు గురయింది. ఇంటి గోడలపైన, కర్రలపైన ఇలా ఎక్కడ పాము కన్పించినా ఏం జరుగుతుందో అని భయంతో వణికిపోయేవారు. చిన్న శబ్దం అయినా సరే భయంతో వెంటనే లేచేవారు. ఇలా రోజూ పాము వేధింపులతో విసిగిపోయిన కుటుంబం.., ఇంటిని కూల్చేస్తేనే పాము బయటకు వెళ్తుందని నిర్ణయానికి వచ్చారు.

అనుకున్నట్లుగానే కప్పు, చెక్కలతో సహా ఇళ్ళు మొత్తం కూల్చేశారు. ఇల్లు కూల్చేయటంతో ఎలుకలన్నీ ఇంట్లో నుంచి వెళ్ళిపోయాయి. దీంతో నాగు పాముకు ఆహారం లేకుండా పోయింది. ఇక మరొక ప్రాంతానికి వెళ్దామని గోడపైనుంచి పాము కిందకు పడింది. అప్పటికే అక్కడ వేచి చూస్తున్న స్థానికులు పామును కొట్టి చంపారు. దీంతో చంద్రయ్య కుటుంబం ఊపిరిపీల్చుకుంది. అయితే పాము కోసం ఇళ్ళు పూర్తిగా కూలగొట్టాల్సి రావటంతో వారు ఇప్పుడు మరొక ఇంట్లో ఉంటున్నారు.

కార్తిక్