బయటపడ్డ చెగువేరా మృతదేహ ఫొటోలు

Posted: 11/15/2014 01:31 PM IST

విప్లవయోధుడు చెగువేరా చనిపోయిన సమయంలో తీసిన పొటోలు అనూహ్యంగా స్పెయిన్ లో బయట పడ్డాయి. ప్రస్తుతం ఈ ఫొటోలో ఇంటర్నెట్ లో హల్ చల్ చేస్తున్నాయి. బొలివియా సైన్యం 1967 అక్టోబర్ 9న ఛే ను కాల్చి చంపిందన్న విషయం తెలిసిందే. బొలివియా సైన్యంలో పనిచేసే ఓ సైనికుడి మేనల్లుడు ఇమానోల్ అర్టెగా ఈ ఫోటోలను బయట పెట్టాడు. తన మామయ్య 1960 సమయంలో బొలివియా సైన్యంలో పనిచేసాడని ఆయన చెప్పాడు. రిటైర్మెంట్ తర్వాత తమ వద్దకు వచ్చి దాదాపు 47సం.లు ఉన్న మామయ్య ఫొటోలను తమవద్దే ఉంచాడని చెప్పారు.

తన మామయ్యకు ఈ ఫొటోలు ఓ ఫ్రెంచి జర్నలిస్టు ఇచ్చాడని మీడియా సంస్థతో అర్టిగా వెల్లడించాడు. బహుశా ఫొటో జర్నలిస్టుకు ఈ ఫొటోల వల్ల ఇబ్బంది కలుగుతుందని భయపడి తన మామయ్యకు ఇచ్చి ఉంటాడని అనుమానం వ్యక్తం చేశాడు. బొలివియాలో చనిపోయిన చెగువేరా ఫొటోలు నలబై ఏడు సంవత్సరాల తర్వాత స్పెయిన్ లోని ఒక చిన్న పట్టణంలో బయట పడటం సంచలనం కల్గిస్తోంది. చనిపోయిన సమయంలో తీసిన ఫొటోల్లో మాసిన గడ్డంతో పాటు, గర్జించే కళ్ళు.., చనిపోయినా తెరిచే ఉన్నాయి. గుండెపై రక్తపు మరకలు కన్పిస్తున్నాయి. అప్పట్లో అందుబాటులో ఉన్న బ్లాక్ అండ్ వైట్ టెక్నాలజీతో  ఈ ఫొటోలు తీశారు.

ఛే గురించి క్లుప్తంగా

1928 జూన్ 14న అర్జెంటీనాలో జన్మించిన చేగువేరా క్యూబా స్వాతంత్ర్య ఉద్యమంలో పాల్గొని విప్లవ యోధుడుగా ప్రపంచానికి ఆదర్శంగా నిలిచాడు. మెడిసిన్ చదివిన చెగువేరా.., విద్యార్థిగా ఉండగానే వివిధ దేశాల్లోని అనేక ప్రాంతాల్లో పర్యటించాడు. లాటిన్ అమెరికా దేశాల్లో ఆకలి, దారిద్ర్యంను చూసి చలించిపోయాడు. అక్కడి ఉద్యమకారులతో చేతులు కలిపి ఎన్నో సంస్కరణలు తీసుకొచ్చారు. ఆ తర్వాత ఫిడెల్ క్యాస్ర్టోతో కలిసి గెరిల్లా దండు నడిపి క్యూబాలో విప్లవం సృష్టించాడు. ప్రజాస్వామ్య ప్రభుత్వం ఏర్పడిన తర్వాత క్యూబాలోనే అనేక పదవుల్లో కొనసాగాడు. ఆ తర్వాత ఫిడెల్ క్యాస్ర్టో వద్దని వారించినా వినకుండా రహస్యంగా బొలివియాకు వెళ్ళాడు. అక్కడ అజ్ఞాతంలో ఉంటూ ప్రజా పోరాటాలు చేశారు. ఈ సమయంలోనే 1967 అక్టోబర్ 9న బొలివియా సైన్యం చెగువేరాను కాల్చి చంపింది. ఎక్కడో పుట్టి.., ఉన్నత విద్యను అభ్యసించి తనకు ఏ మాత్రం సంబంధం లేని దేశాలకు వెళ్లి వారి కోసం పోరాడి.., జీవితమంతా ప్రజలకోసం అంకితం ఇచ్చిన గొప్ప విప్లవ యోధుడు చెగువేరా.

కార్తిక్