ఒకదానికి మోదం.. మరోదానికి ఖేదం!

Posted: 11/05/2014 01:38 PM IST

తెలంగాణ రాష్ట్రంలో టీఆర్ఎస్ ప్రభుత్వం ఏర్పడిన కొద్దిరోజుల తర్వాత తమ నాయకులమీద, శాసనసభ్యుల మీద వ్యంగ్యంగా ప్రసారాలు చేశారని టీవీ9 న్యూస్ ఛానెల్ పై రాష్ట్రంలో ఆంక్షలు విధించిన విషయం తెలిసిందే! అలాగే తప్పుడు సమాచారాలు ప్రచురించారని ఏబీఎస్ ఆంధ్రజ్యోతి ప్రసారాలను కూడా నిలిపివేయడం జరిగింది. మొదట తమ తప్పు తెలుసుకుని క్షమించాలంటూ కోరుకున్నా... ప్రభుత్వం దానిమీద స్పందించలేదు కానీ రాష్ట్ర మల్టీసిస్టమ్ ఆపరేటర్లు (ఎమ్మెస్వో) ఆయా ఛానెళ్ల ప్రసారాలను నిలిపివేశారు.

దాంతో అప్పట్లో జర్నలిస్టుల స్వేచ్ఛను రాష్ట్రప్రభుత్వం హరిస్తోందంటూ ఎన్నోసార్లు నిరసనలు చేశారు. ఈ వ్యవహారంపై జాతీయ మీడియా కూడా స్పందించింది. కేసీయార్ ను 21వ శతాబ్ద హిట్లర్ సీఎంగా వర్ణించాయి కూడా! అంతేకాదు.. అంతర్జాతీయ స్థాయిలో ఈ వ్యవహారం రచ్చరచ్చగా మారింది. అక్కడున్న కొంతమంది సీనియర్ జర్నలిస్టులు ఆయా ఛానెళ్ల ప్రసారాలు పునరుద్ధరించాలని తెలిపారు. అయితే దాదాపు 5 నెలలవరకు కొనసాగిన ఈ వ్యవహారం చివరికి ఒక కొలిక్కి వచ్చినట్లుంది. జూన్ 12వ తేదీన మూతబడిన టీవీ9 న్యూస్ ఛానెల్.. తిరిగి 04-11-2014 రాత్రిసమయంలో తిరిగి ప్రసారమయ్యింది. అయితే ఏబీఎన్ ప్రసారాలను మాత్రం పునరుద్ధరించలేదు. మరి ఆ వ్యవహారం ఎప్పుడూ తేలుతుందో వేచి చూడాల్సిందే!