ప్రముఖ నటుడు సదాశివ్ కన్నుమూత

Posted: 11/03/2014 09:24 AM IST

బాలీవుడ్ ప్రముఖ నటుడు సదాశివ్ అమ్రాపుర్కర్ ఇకలేరు. ఊపిరితిత్తుల ఇన్ ఫెక్షన్ తో బాధపడుతున్న సదాశివ్, ముంబైలోని కోకిలాబెన్ ధిరూభాయ్ అంబానీ ఆస్పత్రిలో చేరారు. చికిత్స పొందుతూ ఆదివారం అర్ధరాత్రి తర్వాత తుదిశ్వాస విడిచారు. ఆదివారం అర్ధరాత్రి 2.45కి సదాశివ్ చనిపోయినట్లు ఆయన కుమార్తె రీమా, మీడియాకు వెల్లడించారు. ప్రజల సందర్శనార్ధం భైదాస్ ఆడిటోరియంలో పార్ధివదేహం ఉంచుతామన్నారు. అహ్మద నగర్ లో అంత్యక్రియలు జరుపుతామని కుటుం సభ్యులు తెలిపారు. సదాశివ్ మృతి పట్ల పలువురు సినీ, రాజకీయ ప్రముఖులు విచారం వ్యక్తం చేశారు.

విలన్, క్యారెక్టర్ ఆర్టిస్టుగా మంచి పేరున్న సదాశివ్ అమ్రాపుర్కర్ 'అర్ధ్' చిత్రం ద్వారా బాలీవుడ్ లోకి అడుగుపెట్టారు. అంఖే, ఇష్క్, కూలీ నెంబర్ 1, గుప్త్ చిత్రాల్లో విలన్ గా, కారెక్టర్ ఆర్టిస్ట్ గా గుర్తింపు పొందారు. 'సడక్' తో విలన్ గా మంచి గుర్తింపు తెచ్చుకున్నారు.  మొదట్లో బాలీవుడ్ లోనే నటించిన సదాశివ్ ఆ తర్వాత క్రమంగా మరాఠీ సినిమాలకు ఎక్కువ ప్రాధాన్యత ఇచ్చారు. అర్ధ్ సత్య, సడక్ చిత్రానికి ఆయన ఫిలింఫేర్ అవార్డు అందుకున్నారు. 2012లో సదాశివ్ సొంతంగా నిర్మించి, నటించిన 'బాంబే టాకీస్' మూవీలో చివరగా తెరపై కనిపించారు. ఆ తర్వాత నటనాజీవితాన్ని తగ్గించుకుంటూ సామజిక సేవలకు ప్రాధాన్యం ఇచ్చారు. పలు స్వచ్చంధ సామాజిక సేవా కార్యక్రమాల్లో సదాశివ్ పాల్గొన్నారు. 64ఏళ్ళ అమ్రాపుర్కర్ కు బార్య ముగ్గురు కుమార్తెలు ఉన్నారు.

కార్తిక్