చైనాదెట్టా క్షేమంగా తిరిగివచ్చింది... చెప్మా.. అమెరికా ఆరా..

Posted: 11/02/2014 05:15 PM IST

అంతరిక్ష ప్రయోగంలో వారం రోజుల్లోనే రెండు చేధు అనుభావాలను చవిచూసిన అగ్రరాజ్యం అమెరికా చైనా విజయపరంపరపై ఆరా తీస్తుందట. రెండువారం కిందట చంద్రునిపైకి వెళ్లిన చైనా మానవరహిత అంతరిక్షనౌక సురక్షితంగా భూమిపై దిగింది. ఉత్తరచైనాలోని మంగోలియా ప్రాంతంలో ఈ అంతరిక్షనౌక దిగినట్లు బీజింగ్ ఏరోస్పేస్ కంట్రోల్ సెంటర్ తెలిపింది. ఈ స్పేస్‌క్రాఫ్ట్ భూమి, చంద్రునికి సంబంధించిన అద్భుతమైన చిత్రాలు తీసిందని ఆ కేంద్రం ఓ ప్రకటనలో పేర్కొన్నది.మొత్తం 8 లక్షల 40 వేల కిలోమీటర్ల ప్రయాణాన్ని సురక్షితంగా ముగించి.. ఈ ఘనత సాధించిన మూడోదేశంగా చైనా నిలిచింది. 40 ఏండ్ల కిందటే సోవియట్ యూనియన్, అమెరికా ఈ ప్రయోగాన్ని విజయవంతంగా ముగించాయి. ఎనిమిది రోజుల కిందట చంద్రునిపైకి వెళ్లిన ఈ అంతరిక్షనౌక శనివారం ఉదయం భూవాతావరణంలోకి ప్రవేశించింది.

ఆ సమయంలో గంటకు 25 వేల మైళ్ల వేగంతో దూసుకొస్తున్న ఈ స్పేస్‌క్రాఫ్ట్ వేగాన్ని శాస్త్రవేత్తలు గణనీయంగా తగ్గించి సురక్షితంగా కిందికి దిగేలా చేశారు. చంద్రుని పైకి వెళ్లి, దాని చుట్టూ ఎగిరి, తిరిగి భూమిపైకి వచ్చే లక్ష్యంతో దీన్ని ప్రయోగించినట్లు స్టేట్ అడ్మినిస్ట్రేషన్ ఆఫ్ సైన్స్, టెక్నాలజీ అండ్ ఇండస్ట్రీ ఫర్ నేషనల్ డిఫెన్స్ (ఎస్‌ఏఎస్‌టీఐఎన్‌డీ) శాస్త్రవేత్తలు తెలిపారు. చంద్రునిపై అన్వేషణలో భాగంగా చైనా ప్రయోగించబోయే చాంగె-5లో వాడాల్సిన టెక్నాలజీని పరీక్షించడానికి ఈ మానవరహిత అంతరిక్షనౌకను ప్రయోగించినట్లు పేర్కొన్నారు. తమ దేశస్థుడు చంద్రునిపై అడుగుపెట్టాలన్న లక్ష్యంతో పనిచేస్తున్న చైనా.. ఆ దిశగా మరో ముందడుగు వేసినట్లు శాస్త్రవేత్తలు తెలిపారు.

జి.మనోహర్