పశువులు రోడ్లపైకి వస్తే రూ.1000 ఫైన్ !

Posted: 10/29/2014 09:52 AM IST

వినటానికి వింతగా ఉన్నా ప్రస్తుతం విశాఖలో ఈ నిర్ణయం అమలుకానుంది. నగర పాలక సంస్థ (జీవీఎంసీ) ఈ నిబంధనను తీసుకువచ్చింది. హుద్ హుద్ తో అతలాకుతలం అయిన విశాఖలో ప్రస్తుతం పునరుద్ధరణ పనులు జరుగుతున్నాయి. తుఫానుతో రోడ్లపై చెట్లన్నీ నేలమట్టం కాగా.., ఇప్పుడు మళ్ళీ కొత్తగా మొక్కలను నాటుతున్నారు. నగరంలో దాదాపుగా రెండు లక్షల మొక్కలు నాటేందుకు అధికారులు సిద్ధం అవుతున్నారు. ఈ నేపథ్యంలో పశువులు రోడ్లపై తిరిగితే మొక్కలను నాశనం చేస్తాయని అధికారులు కలవరపడ్డారు.

దీంతో పశువులను రోడ్లపైకి రానీయకుండా యజమానులు జాగ్రత్తగా ఉండాలని ఆదేశాలు జారీ చేసింది. ఒకవేళ రోడ్లపైకి వస్తే మాత్రం వాటిని గోశాలకు తరలించటంతో పాటు పశువుల యజమానులకు రూ.1000 ఫైన్ విధించాలని నిర్ణయించారు. నగర వాతావరణంతో పాటు గ్రామీణ వాతావరణం కూడా కలిసి ఉండే విశాఖలో పశువులు రోడ్లపైకి రాకుండా యజమానులు వాటికి ఏం చెప్తారో.., ఎలా దారిలో పెడతారో చూడాలి.

కార్తిక్

1000 rupees fine for cattle coming onto roads in vizag