టీఆర్ఎస్ లో ఇవాళ లాంఛనంగా చేరనున్న తెలుగుతమ్ముళ్లు..

Posted: 10/29/2014 07:42 AM IST

టీడీపీ ఎమ్మెల్యేలు గులాబీ గూటికి చేరేందుకు ముహూర్తం ఖరారైంది. గ్రేటర్ హైదరాబాద్ నుంచి ప్రాతినిథ్యం వహిస్తున్న ఎమ్మెల్యేలలతో పాటు ఎమ్మెల్సీ గంగారెడ్డి కూడా ఇవాళ లాంఛనంగా టీఆర్ఎస్ తీర్థం పుచ్చుకోనున్నారు. మహేశ్వరం ఎమె్మల్యే తీగల కృష్ణారెడ్డి, సనత్ నగర్ ఎమ్మెల్యే తలసాని శ్రీనివాస్ యాదవ్ తోపాటు, నిజామాబాద్ జిల్లాకు చెందిన ఎమ్మెల్సీ గంగాధర్ గౌడ్ ఇవాళ సీఎం కేసీఆర్ సమక్షంలో టీఆర్‌ఎస్‌లో చేరనున్నారు. టీకేఆర్ కళాశాల ఆవరణలో సాయంత్రం  జరుగనున్న ఓ కార్యక్రమంలో వారు అధికారికంగా టీఆర్ఎస్ లోకి చేరనున్నారు.

ఈ మేరకు నలుగురు నేతలు తెలంగాణ ముఖ్యమంత్రి సీఎం కేసీఆర్‌ను క్యాంపు కార్యాలయంలో కలసి చర్చలు జరిపారు. నిజాం కాలేజ్‌లో భారీ బహిరంగసభ నిర్వహించి పార్టీలో చేరుతానని తలసాని శ్రీనివాస్‌యాదవ్ చెప్పినప్పటికీ, సీఎం సూచన మేరకు ఇవాళే గులాబీ కండువా కప్పుకోవాలని నిర్ణయించారు. కాగా, గ్రేటర్ పరిధిలోని వివిధ నియోజకవర్గాల్లో  ఉన్న తలసాని, తీగల సహచర టీడీపీ నాయకులు కూడా కేసీఆర్ సమక్షంలో పార్టీ మారుతున్నట్టు సమాచారం. మరోవైపు పార్టీ మారేందుకు ఇప్పటికే టీఆర్ఎస్ నుంచి అనుమతి పొందిన మరో ఎమ్మెల్యే ధర్మారెడ్డి కూడా త్వరలో టీడీపీ పార్టీని వీడనున్నారు. వరంగల్ జిల్లా పరకాలలో ఏర్పాటు చేసే సభ ద్వారా ఆయన పార్టీ మారనున్నారు.

జి.మనోహర్