మోదీ సన్నిహితుడు దేవేంద్రుడికే ‘‘మహా’’ పీఠం దక్కింది!

Posted: 10/28/2014 08:23 PM IST

Finally devendra fadnavis selected as cm candidate of maharashtra state by bjp mlas

ఇటీవలే మహారాష్ట్రలో జరిగిన అసెంబ్లీ ఎన్నికల్లో మరాఠా ప్రజలు తమ నాయకుడ్ని ఎన్నుకోవడంలో కాస్త తడబడినట్లున్నారు. అందుకే.. ఏ పార్టీకి ప్రభుత్వ ఏర్పాటుకు కావాల్సిన సీట్లను కనీస సీట్లను కేటాయించకుండా ఆందోళనల్లో పడేశారు. మొత్తం 288 ఎసెంబ్లీ స్థానాలున్న మహారాష్ట్రంలో కేవలం బిజెపి ఒక్కటే 122 స్థానాలను గెలుచుకోగలిగింది. ఇక సీఎంగా గద్దెనెక్కాలని ఎన్నో ఆశలు పెంచుకున్న ఉద్ధవ్ థాక్రే శివసేన పార్టీ కేవలం 63 స్థానాలను గెలుచుకోగా.. కాంగ్రెస్, ఎన్సీపీ పార్టీలు చాలా తక్కువ సీట్లను మాత్రమే గెలుచుకోగలిగాయి. అయితే ఎన్నికలముందు శివసేన, బిజెపి మద్దతనివ్వడానికి తిరస్కరించడంతో ప్రభుత్వం ఎవరు ఏర్పాటు చేయాలన్న గందరగోళం కొన్నాళ్లపాటు కొనసాగింది.

అయితే బీజేపీకి అత్యధిక స్థానాలు వచ్చిన నేపథ్యంలో ఆ పార్టీ రాష్ట్రంలో అతిపెద్ద పార్టీగా అవతరించడంతోపాటు సొంతంగా ప్రభుత్వం ఏర్పాటు చేసే దిశగా పావులు కదిపింది. దీంతో ఇక చేసేదేమీలేక శివసేన బిజెపికి తిరిగి మద్దతునిస్తామంటూ ప్రకటించడంతో ఇప్పుడా పార్టీ ప్రభుత్వం ఏర్పాటును వేగవంతం చేసింది. ఈ నేపథ్యంలోనే సీఎం పదవి ఎవరికి దక్కుతుందోనన్న అయోమయ స్థితిలో చివరికి దేవేంద్ర ఫడ్నవిస్ ను బీజేపీ శాసనసభాపక్ష నేతగా ఆ పార్టీ ఎమ్మెల్యేలు ఎన్నుకున్నారు. దాంతో ఆ రాష్ట్ర నూతన ముఖ్యమంత్రిగా ఆయనే ప్రమాణస్వీకారం చేయనున్నారు. ఈనేపథ్యంలో బీజేపీ ఎమ్మెల్యేలు ఆ రాష్ట్ర గవర్నర్ విద్యాసాగర్ రావును కలవనున్నారు. ఇక్కడ ఇంకొక ముఖ్యమైన విషయం ఏమిటంటే.. దేవేంద్ర ఫడ్నవిస్ మోడీకి అత్యంత సన్నిహితుడు!