ముగ్గురు నల్ల కుభేరుల పేర్లు వెల్లడించిన కేంద్రం

Posted: 10/27/2014 12:37 PM IST

నల్లధనంకు వ్యతిరేకంగా జరగుతున్న పోరాటంలో కీలకమైన అడుగు పడింది. స్విట్జర్లాండ్ అధికారులు ఇచ్చిన జాబితా ప్రకారం అక్రమంగా డబ్బు దాచిన వారిలో ముగ్గురి పేర్లను కేంద్రం సుప్రీంకోర్టుకు వెల్లడించింది. నల్ల కుభేరులపై సోమవారం రోజు అఫిడవిట్ దాఖలు చేసిన కేంద్రం... ముగ్గురి పేర్లను వెల్లడించింది. ఈ జాబితాను పరిశీలిస్తే.., బర్మన్ గ్రూప్ డైరెక్టర్ గా ఉన్న ప్రదీప్ బర్మన్ పేరును వెల్లడించింది. అంతేకాకుండా రాజ్ కోట్ కు చెందిన ప్రముఖ పారిశ్రామిక వేత్త పంకజ్ చిమన్ లాల్ లోధ్య పేరును అఫిడవిట్ లో పేర్కొంది. ఇక చివరగా.., గోవాకు చెందిన రాధా ఎస్ టింబ్లో పేరును ప్రకటించింది. ఈయన గోవాకు చెందిన మైనింగ్ వ్యాపార వేత్త కావటంతో పాటు టింబ్లో ప్రైవేటు లిమిటెడ్స్ అధినేతగా వ్యవహరిస్తున్నారు.

ఈ జాబితా లో పేర్లున్న ముగ్గురూ తమకు ఎలాంటి అక్రమాస్తులు లేవని ప్రకటించారు. అటు పంకజ్ చిమన్ లాల్ అయితే తనకు స్విస్ అకౌంట్లు లేవు అని కూడా స్పష్టం చేశారు. ప్రభుత్వం చెప్పేవన్ని తప్పుడు లెక్కలు.., తమను అనవసరంగా ఈ కూపంలోకి లాగుతున్నారు అని ఆయన మండిపడ్డారు. అటు తొలి జాబితా ప్రకటించటంతో క్రమంగా మిగతావారికి కూడా గుండెల్లో రైళ్ళు పరిగెడుతున్నాయి.

కార్తిక్