సైక్లోన్ ప్రభావం : సైకిల్ పై జగన్ సవారీ

Posted: 10/14/2014 09:13 AM IST

హుద్ హుద్ తుఫాను బాధితులను పరామర్శించేందుకు వైసీపీ అధినేత జగన్ మోహన్ రెడ్డి ఓదార్పుయాత్ర చేపట్టారు. ఈ ఉదయమే హైదరాబాద్ నుంచి రాజమండ్రికి వెళ్ళిన జగన్.., అక్కడి నుంచి బాధితుల పరామర్శకు రోడ్డుమార్గం ద్వారా వెళ్తున్నారు. అయితే వర్షాలు, వరదలతో చాలా చోట్ల రోడ్లు దెబ్బతినటంతో వాహనాలు వెళ్ళేందుకు సరైన మార్గాలు లేవు. ఇలాంటి పరిస్థితుల్లో కూడా బాధితులను కలుసుకునే ఉద్దేశ్యంతో మోటార్ బైకులపై కూడా ప్రయాణించేందుకు సిధ్దమయినట్లు పార్టీనేతలు తెలిపారు. అవికూడా వెళ్లలేని చోట్లకు సైకిల్ ఎక్కి వెళ్తారని నేతలు వెల్లడించారు. కాలినడకనైనా వెళ్లి బాధితులను పరామర్శిస్తారని అంటున్నారు.

బాధితులను పరామర్శించి వారిని ఓదార్చటంతో పాటు.., ప్రభుత్వ సహాయక చర్యలు వేగవంతం అయ్యేలా ఒత్తిడి తీసుకువస్తానని జగన్ తెలిపారు. ఉత్తరాంధ్రలో పరిస్థితి సాధారణస్థాయికి వచ్చేవరకు అక్కడే ఉంటానని చెప్పారు. ప్రకృతి చేసిన దాడికి ఏపీ ప్రజలు తల్లిడిల్లుతున్నారు. మూడు రోజులుగా తిండి, నిద్ర మానుకుని నీళ్ళలో బ్రతుకుతున్నారు. విశాఖ నగరంలో కారు చీకట్లు కమ్ముయగా.., ప్రజలు అష్టకష్టాలు పడుతున్నారు. తినటానికి తిండి లేదు. తాగటానికి నీరు లేదు. ఏటీఎంలలో డబ్బులు లేక నానా ఇబ్బందులు పడుతున్నారు. అటు సమాచార వ్యవస్థ కూడా కుప్పకూలటంతో ఉత్తరాంధ్ర ప్రజలకు బయటి ప్రపంచంతో సంబంధాలు తెగిపోయాయి. వర్షాలు తగ్గుముఖం పట్టడంతో ప్రస్తుతం సహాయక, పునరావాస, మరమ్మత్తు చర్యలు వేగవంతం అయ్యాయి.

కార్తిక్