తుఫాను బాధితులకు తక్షణ సాయం ప్రకటన

Posted: 10/13/2014 05:20 PM IST

Andhrapradesh cm announce ex gratia to cyclone victims

హుద్ హుద్ తుఫాను బాధితులకు ఏపీ ప్రభుత్వం తక్షణ సాయం ప్రకటించింది. తుఫాను ప్రభావిత ప్రాంతాల్లో పరిస్థితిపై అధికారులతో సమీక్షించిన అనంతరం చంద్రబాబు సాయం వివరాలు ప్రకటించారు. ప్రకృతి విపత్తులో మృతి చెందిన వారి కుటుంబాలకు రూ. 5లక్షల చొప్పున సాయం ప్రకటించారు. తీవ్రంగా గాయపడిన వారికి రూ. 1లక్ష ప్రకటించారు. అదేవిధంగా మత్స్యకారుల పడవలు దెబ్బతింటే రూ. 25వేలు, వలలు నష్టపోతే రూ.5వేలు సాయం ప్రకటించారు. అటు పశువులు మృతి చెందితే రైతులకు రూ. 25వేల సాయం ప్రకటిస్తామన్నారు.

తుఫాను బాధితులను ప్రభుత్వం ఆదుకుంటుందని భరోసా ఇచ్చారు. ఇప్పటివరకు చేపట్టిన ముందస్తు జాగ్రత్తల వల్ల తుఫానును నష్టాలను చాలావరకు తగ్గించగలిగామన్నారు. వీలైనంత త్వరగా విద్యుత్, సమాచార వ్యవస్థలను పునరుద్ధరిస్తామని చెప్పారు. పరిస్థితిని ఎప్పటికప్పుడు స్థానిక ఎమ్మెల్యేలు, అధికారులు సమీక్షించి సాయం చేసేందుకు సిద్ధంగా ఉంటారని వెల్లడించారు. సాధారణ పరిస్థితులు నెలకొనే వరకు తాను విశాఖలోనే ఉండి సహయక చర్యలను పర్యవేక్షిస్తానని మరోసారి ప్రకటించారు. అటు తుఫాను ప్రభావిత ప్రాంతాల్లో పర్యటించేందుకు ప్రధాని మోడి మంగళవారం విశాఖకు వస్తున్నారు.

కార్తిక్