స్వచ్ఛ భారత్ కోరుకున్న శశిథరూర్ సస్పెన్షన్

Posted: 10/13/2014 03:49 PM IST

Shashi tharoor removed as congress spokesperson

ఎంకి పెళ్ళి సుబ్బి చావుకు వచ్చినట్లు ప్రధాని నరేంద్రమోడి చేపట్టిన ‘స్వచ్ఛ భారత్’ కార్యక్రమం శశిథరూర్ ను దెబ్బతీసింది. థరూర్ ను కాంగ్రెస్ పార్టీ అధికార ప్రతినిథి హోదా నుంచి తొలగిస్తూ కాంగ్రెస్ పార్టీ నిర్ణయం తీసుకుంది. ఈమేరకు పార్టీ ప్రకటన విడుదల చేసింది. ఇకపై శశిథరూర్ కేవలం పార్టీ నేతగా కొనసాగుతారు తప్ప.. అధికార ప్రతినిధి హోదాలో ఆయన ఉండరు అని స్పష్టం చేసింది. ఈ చర్య పట్ల కేరళ కాంగ్రెస్ పార్టీ నేతలు స్పందిస్తూ.., పార్టీకి వ్యతిరేకంగా మాట్లాడేవారికి ఇది తగిన గుణపాఠం అన్నారు.

మహాత్ముడు గాంధీ జయంతి అక్టోబర్ 2న ప్రధాని నరేంద్రమోడి ‘స్వచ్చ భారత్’ కార్యక్రమం ప్రారంభించారు. ఈ శుభ్రతా కార్యక్రమంలో మంత్రులు, ప్రభుత్వ ఉద్యోగులతో పాటు బీజేపి నేతలు, కార్యకర్తలు, పలు స్వచ్చంద సంస్థలు పాల్గొన్నాయి. ‘స్వచ్ఛ భారత్’ ను శశిథరూర్ ప్రశంసించారు. ఇలాంటి కార్యక్రమాలు దేశానికి అవసరమన్నారు. బీజేపి ప్రభుత్వ కార్యక్రమంను థరూర్ మెచ్చుకోవటం పట్ల కేరళ కాంగ్రెస్ నేతలు ఆగ్రహం వ్యక్తం చేశారు. ప్రత్యర్థి పార్టీని మెచ్చుకుంటే మనల్ని తక్కువ చేసి చూసుకున్నట్లే అవుతుందని.., ఇలాంటి వ్యాఖ్యలు భవిష్యత్తులో చేయకుండా థరూర్ ను పార్టి నుంచి సస్పెండ్ చేయాలన్నారు. కేరళ కాంగ్రెస్ పార్టీ విజ్ఞప్తితో హైకమాండ్ ఈ నిర్ణయం తీసుకుంది.

కార్తిక్