హుదూద్ తో వరి, అరటి పంటలకు అపారనష్టం

Posted: 10/12/2014 06:55 PM IST

విజయనగరం జిల్లాలో హుదూద్ తుపాను పెను ప్రభావాన్ని చాటింది. హుదుద్ తుపాను తాకిడికి జిల్లాలోని వరి, అరటి పంటలకు తీవ్ర నష్టం వాటిల్లింది. జిల్లాలోని బలిజిపేట మండలంలో రైతులకు తీవ్ర నష్టపోయారు. శనివారం అర్ధరాత్రి నుంచి వీస్తున్న పెనుగాలులకు మండలంలోని వివిధ గ్రామాల్లోని వరిపంట నేలమట్టమైంది. తుమరాడ, వెంగాపురం, బలిజిపేట, గంగాడ, వంతరాం గ్రామాల్లో కోతకు సిద్ధంగా ఉన్న అరటిపంట గెలలు విరిగిపోయాయి.

భారీ వర్షాల ధాటికి విద్యుత్తు సరఫరా నిలిపివేయడంతో పెనుప్రమాదం తప్పింది. బలిజిపేట, పలగర గ్రామాల్లో భారీ వృక్షాలు కూలడంతో సమీపంలోని విద్యుత్తు స్తంభాలు నేలకూలాయి. వెంగాపురంలో ఇటుకబట్టీలు తడిసిపోయాయి. పెనుగాలులతో కూడిన వర్షం కురుస్తుండటంతో ప్రజలంతా ఇళ్లలోనే తలదాచుకుంటున్నారు. నూకలవాడ గ్రామంలో తుపాను పరిస్థితిని తహశీల్దార్ ఈశ్వరమ్మ ఎప్పటికప్పుడు సమీక్షించారు.

జి.మనోహర్