ఇదేలే.. తరతరాల (ఎన్నికల) చరిత్రం..

Posted: 10/11/2014 07:44 AM IST

మహారాష్ట్ర అసెంబ్లీ ఎన్నికలు రికార్డులను బ్రేక్ చేస్తున్నాయి. ప్రజాసేవ పరమార్థంగా ప్రజాస్వామ్యయుతంగా, రాజ్యాంగ బద్దంగా జరుగుతున్న ఎన్నికలలో వీరు ఎక్కడి నుంచి చోరబడ్డారో తెలియదు. అప్పటి నుంచి వీరు లేకుండా ఎక్కడా ఏ రాష్ట్ర ఎన్నికలు, సార్వత్రిక ఎన్నికలు జరగడమే లేదు. ఇంతకీ వారెవరంటారా..? వారే నేరచరితులు.. మహా అసెంబ్లీ సంగ్రామంలో 798 మంది నేర చరితులు బరిలో ఉన్నారు. అసెంబ్లీ ఎన్నికలలో అన్ని పార్టీలు ఒంటరిగానే బరిలోకి దిగడంతో.. ఎవరికి వారు పోటీ పడి మరి నేరచరితులకు టిక్కెట్లు ఇచ్చారని అసోసియేషన్ ఫర్ డెమోక్రాటిక్ రిఫార్మ్స్ (ఏడీఆర్) అనే స్వచ్ఛంధ సంస్థ వెల్లడించింది. సగం మంది అఫిడెవిట్లు పరిశీలించడంతోనే నేర చరితుల సంఖ్య ఇంతలా వుందంటే.. ఇక పూర్తి అభ్యర్థులలలో ఎంత మంది వున్నారోనన్న అనుమానాలను సంస్థ వ్యక్తం చేసింది.

అసెంబ్లీ ఎన్నికల్లో పోటీ చేస్తున్న 4,119 మంది అభ్యర్థుల్లో 2,336 మంది సమర్పించిన అఫిడవిట్లను పరిశీలించగా క్రిమినల్ కేసులు ఎదుర్కొంటున్న వారి సంఖ్య 798 అని తేలిందని ఏడీఆర్ అధినేత మేజర్ జనరల్(రిటైర్డ్) అనిల్ వర్మ వెల్లడించారు. క్రిమినల్ కేసులున్న వారికి ఎక్కువ టికెట్లు ఇచ్చి బరిలో నిలపడంలో పార్టీల్లో శివసేన ముందువరుసలో ఉంది. 278 మంది శివసేన అభ్యర్థుల్లో 169 మంది (61 శాతం)పై క్రిమినల్ కేసులున్నాయని సంస్థ పేర్కొంది.

జి.మనోహర్