అగ్రరాజ్యం అమెరికాలో తొలి ఎబోలా మరణం..

Posted: 10/09/2014 05:47 PM IST

దక్షిణాఫ్రికా తరువాత అగ్రరాజ్యం అమెరికాను ఎబోలా వ్యాధి కలకలం రేపుతోంది. గట్టి భద్రతా చర్యలు తీసుకున్నప్పటికీ అమెరికాలో ఎబోలా వ్యాధి సోకి ఒక వ్యక్తి మరణించాడు. అమెరికాలోనూ ఎబోలా వ్యాధితో తొలి మరణం చోటుచేసుకోవడంపై అక్కడి పౌరులు ఆందోళన చెందుతున్నారు. లిబిరియా జాతీయుడు థామస్‌ ఎరిక్‌ డంకన్‌.. ఎబోలా వైరస్‌ వ్యాధితో మృతి చెందాడు. అమెరికాలో ఈ వైరస్‌ సోకి దానికి బలైన తొలి వ్యక్తి మృత్యువు నమోదు కావడంతో అమెరికన్లలో అందోళన మొదలైంది.

సెప్టెంబర్‌ చివరి వారంలో థామస్‌ ఎరిక్‌ డంకన్‌ (42) అనే వ్యక్తి అమెరికాలోని టెక్సాస్‌ రాష్ర్టానికి వచ్చిన కొన్ని రోజులకే ఎబోలా వైరస్‌ సోకింది. అతన్ని డల్లాస్‌లోని టెక్సాస్‌ హెల్త్‌ ప్రెస్‌ బిటెరియన్‌ ఆసుపత్రిలో ప్రత్యేక వార్డులో రెండు వారాల పాటు వైద్యం అందించినప్పటికీ ఫలితం లేకపోయింది. పరిస్థితి విషమించడంతో డంకన్ మృతి చెందారు. కాగా ఎబోలా వైరస్‌ను నిర్వీర్యం చేయడానికి తోడ్పడే టార్గెట్‌ను శాస్త్రవేత్తలు కనుగొన్నారు. వైరస్‌లోని బలహీన ప్రాంతాన్ని గుర్తించిన యూనివర్సీటీ ఆఫ్‌ అటావా పరిశోధకులు పరమాణువును రూపొందించారు. దీని సాయంతో వైరస్‌ నిర్మూలన మందులను తయారు చేయొచ్చని వారు ఆశాభావం వ్యక్తం చేశారు.

జి. మనోహర్