హైదరాబాద్ సిటీకి మరో బంపరాఫర్!

Posted: 10/03/2014 09:25 PM IST

విభజనం అనంతరం హైదరాబాద్ నగరం నుంచి ఐటీ హబ్ ఓ మోస్తరు ఖాళీ అవుతోందంటూ అప్పట్లో బాగానే ప్రచారాలు జరిగాయి. కొన్ని కంపెనీలు కూడా వెనక్కు వెళ్లిపోయినట్లు వార్తలు కూడా వచ్చాయి. అయితే అలాంటివేమీ జరగలేదని, హైదరాబాద్ నగరంలో ఐటీ కంపెనీలు సవ్యంగానే వున్నాయంటూ తెలంగాణ ప్రభుత్వం ప్రకటన ఇచ్చేసింది. అలాగే భాగ్యనగరాన్ని ప్రపంచంలో స్థాయిలో చాలా గొప్పగా తయారుచేస్తామంటూ సీఎం కేసీఆర్ ఎన్నోసార్లు వ్యాఖ్యానాలు చేశారు. ఇక్కడ బిజినెస్ వ్యవహారాల గురించి ఇతర దేశాలకు చెందినవారితోపాటు మన దేశంలో వున్న ప్రముఖ వ్యాపారవేత్తలతో కూడా సమావేశమయ్యారు. వాటి ఫలితాలు ఎలావున్నా.. తాజాగా అందుతున్న సమాచారాల ప్రకారం హైదరాబాద్‌లో మరో ప్రతిష్టాత్మకమైన ప్రాజెక్టు మొదలవుతున్నట్లు ప్రచారం జోరుగా సాగుతోంది.

ఇటీవలే మైక్రోసాఫ్ట్ సీఈఓ సత్య నాదెళ్ల హైదరాబాద్‌‌కు వచ్చి కేసీఆర్‌తో భేటీ అయిన విషయం తెలిసిందే! ఈ భేటీలో ఏ విషయాల గురించి చర్చలు జరిగాయన్న విషయం మీద ప్రభుత్వం ప్రెస్‌నోట్ ఇంతవరకు రిలీజ్ చేయలేదు కానీ.. ఒక ముఖ్యమైన అంశం చర్చకు వచ్చిందని.. అందులో ఇరువర్గాలు ఓ అంగీకారానికి వచ్చాయని సమాచారం. హైదరాబాద్‌లో మైక్రోసాఫ్ట్ కార్పొరేషన్ క్లౌడ్ డేటా సెంటర్‌ను ఏర్పాటు చేసే అవకాశాలు చాలా వున్నాయని ఓ ప్రతిపాదన వెలువడుతోంది.

దేశంలోని మూడు ప్రధాన నగరాల్లో ఇలాంటి సెంటర్లు ఏర్పడుతాయని ఇదివరకే సత్య ప్రకటించారు కూడా! కానీ ఆ నగరాలేవో వెల్లడించలేదు. అయితే కేసీఆర్‌తో భేటీ అయిన సందర్భంగా ఈ సెంటర్ ఒకటి హైదరాబాద్‌లో ఏర్పాటు చేయడానికి ఆయన సుముఖుత వ్యక్తం చేసినట్లు ప్రభుత్వ వర్గాల నుంచి సమాచారాలు వస్తున్నాయి.అయితే ఇంకా ఈ విషయానికి సంబంధించి అధికారిక ప్రకటన మాత్రం వెలువడలేదు. భూకేటాయింపులు, ఒప్పందాలు పూర్తి అయిన తరువాత ప్రకటనను విడుదల చేయాలనే ప్లాన్‌లో వున్నట్లు తెలుస్తోంది. ఒకవేళ ఈ సెంటర్ హైదరాబాద్‌లో పడితే.. ఇక ఐటీ రంగంలో వున్నవారికి పండగే పండగ!

AS