ఒకే ఆటలో రెండు స్వర్ణాలు గెలుచుకున్న భారత్!

Posted: 10/03/2014 05:35 PM IST

ఇంచియాన్‌లో జరుగుతున్న ఆసియా క్రీడల్లో భారత్ వేగాన్ని బాగానే పుంజుకున్నట్లు కనిపిస్తోంది. మొదట్లో స్వర్ణాలు గెలవడంలో అవస్థలు పడిన ఇండియా ఆటగాళ్లు.. ఇప్పుడు వరుసగా పసిడి పతకాలను ఒక్కొక్కొటిగా గెలుచుకుంటున్నారు. అంతేకాదు.. ప్రపంచంలోనే సరికొత్త రికార్డులు సృష్టించుకుంటూ ముందుకు దూసుకుపోతున్నారు. ఒకవైపు సీనియర్ ఆటగాళ్లు వెనుదిరిగి ఇంటిముఖం పడుతుంటే.. జూనియర్లు మాత్రం తమ సత్తా చాటుకుంటూ పతకాలతో వెలిగిపోతున్నారు.

ఇదిలావుండగా.. తాజాగా భారత్ ఖాతాలో మరో రెండు స్వర్ణాలు చేరిపోయాయి. అది కూడా ఒకే ఆటలో! అంటే.. కబడ్డీ జట్టులో బారత మహిళలు, పురుషులు జట్లు తమ సత్తా చూపాయి. ఈ రెండు జట్లు శుక్రవారం ఉదయం ఫైనల్లో గెలిచి రెండు స్వర్ణాలను సాధించాయి. తొలుత భారత్ మహిళల కబడ్డీ జట్టు 31-21 తేడాతో ఇరాన్‌పై గెలుపొంది పదో స్వర్ణాన్ని భారత్‌కు దక్కేలా చేశారు. వీళ్లు గెలిచిన కాసేపటికే పురుషులు ఫైనల్లో ఇరాన్‌పై 27-25 తేడాతో స్వర్ణాన్ని గెలుచుకున్నారు. దీంతో మొత్తం భారత్ ఖాతాలో 11 స్వర్ణాలు చేరిపోయాయి.

AS