కటకటాల్లోనే పురచ్చి తలైవి.. దసరా తరువాతే బెయిల్..

Posted: 10/01/2014 11:32 AM IST

అన్నాడీఎంకే అధినేత్రి, తమిళనాడు మాజీ ముఖ్యమంత్రి జయలలితకు మరోమారు కర్ణాటక హైకోర్టు చుక్కెదురైంది. అక్రమాస్తుల కేసులో సీబీఐ ప్రత్యేక న్యాయస్థానం వెలువరించిన తీర్పుపై స్టే విధించాలంటూ ఆమె దాఖలు చేసిన బెయిల్ పిటిషన్ను కర్ణాటక హైకోర్టు ప్రత్యేక న్యాయస్థానం ఇవాళ విచారణకు స్వీకరించింది. పురచ్చితలైవి బెయిల్పై పబ్లిక్ ప్రాసిక్యూటర్ అభ్యంతరం వ్యక్తం చేయటంతో.. జయలలిత బెయిల్ పిటీషన్ పై విచారణను ఈ నెల 7కు వాయిదా వేసింది.

బెయిల్ వస్తుందని ఎంతో ఆశగా వేచిచూసిన జయలలితకు మరోసారి నిరాశే ఎదురైంది. జయలలిత బెయిల్ పిటీషన్ ను ప్రత్యేక న్యాయస్థానంలో విచారించలేమని పబ్లిక్ ప్రాసిక్యూటర్ అభ్యంతరం వ్యక్తం చేయటంతో జయకు బెయిల్ ఇవ్వటం కుదరదని న్యాయస్థానం స్పష్టం చేసింది. ఈనెల ఏడో తేదీన హైకోర్టు సాధారణ బెంచ్లో విచారణకు ఆదేశించింది. మరోవైపు కోర్టు తాజా తీర్పుతో జయలలితతో పాటు అన్నాడీఎంకే వర్గాలకు మళ్లీ నిరాశకు లోనయ్యారు. కోర్టు తీర్పు నేపథ్యంలో పరప్పన అగ్రహర జైలు గది ఈ దసారకు జయలలితకు విడిది ఇవ్వనుంది. పార్టీ నేతలు, కార్యకర్తలు, అధికారులు, మంత్రుల మధ్య జరగాల్సిన జయలలిత దసరా వేడుకలు జైలులో గడవనున్నాయి. కార్యకర్తలు, అభిమానులు ఎవరూ అధైర్య పడవద్దని, ఈ నెల 7న తమ అధినేత్రి బెయిల్ పై బయటకు వస్తారని పార్టీ వర్గాలు అంటున్నాయి.

జి మనోహర్