జనంలోకి వచ్చినా.. జాబితాలోకి రాని జనసేన..

Posted: 09/25/2014 11:25 AM IST

జనంలోకి బలంగా వచ్చిన జనసేన.. జబితాలోకి ఎందుకు రాలేదు..? ఇప్పుడిదే ప్రశ్న పవర్ స్టార్ పవన్ కల్యాన్ అభిమానుల్ని కలవర పరుస్తుంది. ఈ ఏడాది మార్చి 14న జనసేన పార్టీని స్థాపించిన పవన్.. ఆ సందర్భంలోనే తన పార్టీని రిజిస్టర్ చేయాలని పవన్ కల్యాన్ పెట్టుకున్న ధరఖాస్తునే  కేంద్ర ఎన్నికల సంఘం కుదరదని తిప్పి పంపింది. ఆ తరువాత దేశవ్యాప్తంగా వంద కొత్త పార్టీలు కేంద్ర ఎన్నికల సంఘం వద్ద రిజిస్టర్ చేసుకున్నా.. జనసేన మాత్రం రిజిస్టర్ కాలేదు.

తాజాగా కేంద్ర ఎన్నికల సంఘం విడుదల చేసిన జాబితా ప్రకారం ఆంధ్రప్రదేశ్‌లో 9 రాజకీయ పార్టీలు ఏర్పాటయ్యాయి. అయితే ఇవన్నీ ఎన్నికలకు ముందు దరఖాస్తు చేసుకున్న పార్టీలేనని చెప్పింది. సార్వత్రిక ఎన్నికల అనంతరం రాజకీయ పార్టీగా రిజిస్ట్రేషన్ కోసం దరఖాస్తు చేసుకున్న జనసేన పార్టీ పేరు మాత్రం తాజాగా ఈసీ విడుదల చేసిన జాబితాలో లేదు.

పార్టీని స్థాపించిన తమ నేత జనసేనను రిజిస్టేషన్ చేయించుకోవడం మరిచాడా..? లేక ఆయన పెట్టుకున్న ధరఖాస్తు కేంద్ర ఎన్నికల సంఘానికి అందలేదా..? అని అభిమానులు కలవర పడుతున్నారు. ఇంతకీ ఏమైంది. తమ పార్టీని కావాలని అధికారులు రిజిస్టర్ చేయడం మరిచారా..? అంటూ నిప్పులు చెరుగుతున్నారు. అయితే తొందర పడకండి.. దీనిపై పవన్ కల్యాన్ వివరణ ఇస్తారని మరి కొందరు అభిమానులు అంటున్నారు.

 జి మనోహర్