మెట్రో రైలు పేరును మారుస్తాం

Posted: 09/20/2014 09:48 AM IST

మెట్రో రైలుకు నిజాం పేరు కలిసే విధంగా 'నిజ్' అని పేరు పెట్టాలని తెలంగాణలోని టీఆర్ఎస్ ప్రభుత్వం పరిశీలించడాన్ని బీజేపి జాతీయ కార్యవర్గసభ్యుడు నాగం జనార్థన్ రెడ్డి తప్పు బట్టారు. అసలు నిజాంకు, మెట్రో రైలుకు సంబంధం ఏమిటని ఆయన సూటిగా ప్రశ్నించారు. తెలంగాణలో మా పార్టీ అధికారంలోకి వచ్చాక ఇలాంటి పేర్లను తొలగిస్తామని వ్యాఖ్యానించారు. నిత్యం నిజాం జపం చేసే వాళ్లకు కూడా ప్రజలు గుణపాఠం చెప్పాలని ఆయన పిలుపునిచ్చారు. నిజాం పాలనలో సాగిన ఆరాచకాలు చాలవన్నట్లు ఆయన పేరును ప్రభుత్వం పరిశీలించడం సహేతుకం కాదన్నారు.

జూరాల, కల్వకుర్తి లిఫ్ట్ ఇరిగేషన్లు నీట మునిగినా..  మంత్రులు పట్టించుకోవడం లేదని విమర్శించారు. ముఖ్యమంత్రి కేసీఆర్‌కు కూడా సోయి లేదా అని దుయ్యబట్టారు. నాలుగు మాసాలు కావస్తున్నా.. ప్రభుత్వం ప్రజలు చేసిన మేలు ఏమిటో చెప్పాలని ఆయన నిలదీశారు. టీఆర్ఎస్ అధికారంలోకి వచ్చాక హైదరాబాద్ బ్రాండ్ ఇమేజ్ దెబ్బ తిందన్నారు. మెట్రోపై అపోహలు తొలగించాలని కేసీఆర్‌ను డిమాండ్ చేశారు.

జి.మనోహర్