మరికొన్ని గంటల్లో ఉపపోరు విజేతల ప్రకటన

Posted: 09/16/2014 07:30 AM IST

దేశవ్యాప్తంగా: పదిరాష్ట్రాలో 3 ఎంపీ, 33 అసెంబ్లీ స్థానాలకు ఈ నెల 13న జరిగిన ఉప ఎన్నికల ఫలితాలు మరికొన్ని గంటల్లో విడుదల కానున్నాయి. దేశవ్యాప్తంగా మినీ ఫోల్స్ ను తలపించిన ఈ ఎన్నికలను అన్ని పార్టీలు ప్రతిష్టాత్మకంగా తీసుకుని తలపడ్డాయి. కాగా, ఈ ఎన్నికలలో కూడా బీజేపి అత్యధిక స్థానాలు గెలుచుకుంటుందని రాజకీయ విశ్లేషకులు భావిస్తున్నారు. ఎన్నికలు జరిగిన 33 అసెంబ్లీ స్థానాల్లో 24 స్థానాలు బీజేపి సభ్యులవే కావడం విశేషం.. మిత్రపక్షాలైన అప్నాదళ్, టీడీపీలకు చెందిన స్థానాలు చెరొకటున్నాయి. యూపీలోని 11 అసెంబ్లీ స్థానాల్లో వచ్చే ఫలితాలు వచ్చే శాసనసభ ఎన్నికలకు ఒక సంకేతంగా భావిస్తున్నారు.

అటు ఉభయ తెలుగు రాష్ట్రాల్లో జరిగిన ఉప ఎన్నికల ఓట్ల లెక్కింపు కొనసాగుతోంది. తెలంగాణలోని మెదక్ లోక్‌సభ స్థానంతోపాటు ఆంధ్రప్రదేశ్‌లోని కృష్ణాజిల్లా నందిగామ అసెంబ్లీ నియోజకవర్గాలకు జరిగిన ఉప ఎన్నికలలో నందిగామ ఫలితం ఉదయం 11 గంటల లోపు వెలువడుతుందని, మెదక్ ఫలితం మధ్యాహ్ననికి వస్తుందని అధికారుల అంచనా. ఈ ఎన్నికలలో రెండో స్థానం కోసమే ఎన్నికలు జరిగాయని టీఆర్ఎస్ వర్గాలు అంటున్నాయి. కాగా తమ గెలుపు సాథ్యమని, అయితే ఏ మేరకు మోజారిటీ వస్తుందన్న విషయంలోనే తాము వేచిచూస్తున్నామని అధికారపార్టీ వర్గాలు స్పష్టం చేస్తున్నాఃయి. మెదక్ ఉప ఎన్నిక లెక్కింపు పటాన్‌చెరు మండలం రుద్రారంలోని గీతం విశ్వవిద్యాలయంలో జరగుతోంది. ఈ లెక్కింపు ప్రక్రియలో మొత్తం 121 మంది పర్యవేక్షకులు, 120 మంది సహాయకులతో పాటు 144 మంది మైక్రో అబ్షర్వర్లు పాల్గొననున్నారు. మెదక్ లోక్‌సభ స్థానానికి 22 రౌండ్లలో, నందిగామ 15 రౌండ్లల్లో ఓట్ల లెక్కింపు జరుగుతుందని ఎన్నికల సంఘం అధికారులు తెలిపారు.

జి.మనోహర్